Ярашиши аниқ: қора сочли аёлларга кийиш тавсия қилинадиган рангдаги либослар

Кийиниш борасида дидли ва мафтункор кўриниш учун қомат ва бўйдан ташқари, тери ва соч рангини ҳам инобатга олиш образнинг муваффақиятли якунланишини таъминлайди.

Ёрқин пушти

Бир вақтнинг ўзида қувноқлик ва романтикани ўзда акс эттирган мазкур рангдаги либосни нафақат норасмий, балки жиддий ва алоҳида учрашувларга ҳам кийиш мумкин.

Асосийси максимал даражада сипо бичим ва дизайндаги моделларга эътибор қаратиш керак.

Тўқ кўк

Navy blue рангида либос кийган бирон аёл эътиборсиз қолиши мумкин эмас. Тotal look, яъни бошдан оёқ кўк рангдаги либос ёки бошқа рангдаги кийимга кўк аксессуар ёки деталь қўшилса, янада яхши.

Бунда образ башанг, унинг эгаси эса дидли кўринади.

Қизил

Классик қизил ранг ҳамда тим қора сочлар эътибор марказида бўлиш ва ҳаммадан ажралиб туриш учун энг мукаммал вариант.

Оқшом тадбирлари ва зиёфат учун образни қизил рангли лаб бўёғи билан якунлаш тавсия қилинади.

Ёрқин бўлмаган сариқ

Сариқнинг ёрқин бўлмаганидан тикилган либос ва кўйлаклар нафақат ёз кунлари, балки олтин куз учун ҳам айни муддао.

Қолаверса, алоҳида кун ва махсус зиёфатларга ҳам мазкур рангдаги либосни танлаб атрофдагилардан ўзгача кўриниш мумкин. Унга ёрқинлик қўшиш учун қизил лаб бўёғидан фойдаланиш мумкин.

Оқ

Оқ ранг сочлари қора қизларга қизилдан кам ярашмайди. Айниқса, ундан либос кийган аёл ёки қизнинг териси буғдойранг бўлса.

Оппоқ қизларга эса ёрқин макияж орқали гўзаллигига урғу бериш тавсия қилинади.