Мода тинимсиз ўзгаришда, ҳаттоки икки йил олдинги моделлар ҳам ҳозир трендда бўлмаслиги мумкин. Қуйида аллақачон урфдан қолган ҳамда гардеробдан чиқариш вақти келган свитер моделлари билан танишинг.
Тор ва калта свитер
Ҳозир бундан бир неча йиллар аввал урфда бўлган калта ва тор свитерларни деярли ҳеч ким харид ҳам қилмайди. Сабаби у қулайлик ва қоматни таъкидлаш жиҳатидан танловга тўғри келмайди. Балки у модага айланган вақтда аёллар чиндан ҳам қоматнинг мукаммаллигига эътибор қаратмагандир. Шу туфайли ҳам уни кийиш ва модага айлантириш осон бўлган. Унинг ўрнини ҳозирда кенг ва бироз узунроқ свитерлар эгаллади. Балки улар қоматни яққол кўрсатмас, лекин нуқсонларни яшириш хусусиятига эга.
Узун ва ёпишиб турувчи свитер
Жинси матодаги шим билан узун ёпишиб турувчи свитерлар барчанинг ёдида бўлса керак. Бундай кийимлар ҳам қоматни унчалик гўзал кўрсатмаган, аксинча жинси матоси қалинлиги туфайли юмшоқ матодаги свитер остидан хунук кўринишни ҳосил қилади. Шунинг учун узун ҳамда баданга ёпишиб турувчи свитерлар айни кунда модадан қолганини тан олиш керак.
Тўрли свитер
Тўр билан уйғунлаштирилган свитерлар урфда бўлмаган моделлардан бири ҳисобланади. Сабаби свитерлар куз ва қиш мавсуми учун мўлжалланган, тўр эса бироз юпқа ва совуқ ҳавога мос эмас. Шунинг учун ҳам ушбу модель ўз ўрнини янги кўринишдаги свитерларга бўшатиб берди.
Кесмали свитер
Қишда фойдасиз бўлган яна бир модель. Сабаби совуқ ҳавода танани умуман иситмайди, махсус безак берилган кесмалар орасидан совуқ ҳаво кириб туради. Агар айнан шундай услубдаги свитерларни ёқтирадиганлар бўлса, уларга жундан тайёрланган V шаклидаги свитерларни кийиш тавсия этилади.
Мунчоқ ёки кўзлар билан безатилган свитер
Мунчоқ ва кўзлар ёрдамида безатилган свитерлар ташқи кўринишни бойитади, деган фикр нотўғри. Улар фақатгина арзон комбинация ёки бачкана кўринишни ҳосил қилиши мумкин. Замонавий кўринишдаги свитерларни кийиш истагида бўлганлар сокин ранг ёки босма нақшларга эътибор бериши керак. Ёрқин пушти, қизил, тўқ сариқ каби рангли моделлар мода оламига қизиқувчилар учун мос келади.
Бурмали свитер
Бу ҳам безак беришнинг бир тури бўлиб, бир вақтлар аёлларнинг энг севимли модели ҳисобланган. Лекин ҳозирда у камчиликлари туфайли ўз-ўзидан урфдан қолди. Масалан, қоматни семиз қилиб кўрсатиши ёки унинг устидан кийилган костюм ёки плаш билан ноқулайлик туғдириши мумкин.
Шаклсиз свитер
Бу айни кунда модада бўлган моделлардан. Аммо ушбу модель учун зич ва қалин тўқилган матолар керак бўлади. Юпқа ва юмшоқ матодан оверсайз услубидаги свитерлар ҳозирги замонавий кўринишни бермайди, аксинча эскирган ва сифатсиз либос каби кўринади.
Ранг-баранг свитер
Албатта, фақат сокин рангдаги свитерларни кийиш керак, деган фикрдан йироқмиз. Лекин айнан айлана шаклида ишланган ранг-баранг свитерлар бироз қўпол кўринади. Ёрқин рангли свитерларни кийиш истагидаги аёлларга ҳар қандай рангда, фақат бошқа дизайнда ишлаб чиқарилган свитерлар тавсия этилади, шу билан бирга, уларни жинси шим ва кроссовкалар билан уйғунлаштирган маъқул.
Изоҳ (0)