Ҳар кимнинг кийиниш услуби турлича. Ундан, албатта, модага ҳамоҳанг, замонавий кўриниш яратиш мумкин. Бунинг учун кўп нарса талаб қилинмайди. Бор-йўғи қуйидаги тавсияларга қулоқ тутинг.
Оқ кофта
Доимгидек, оқ кофталарни юбканинг ички қисмига киритиб кийишни бас қилиш вақти келди. Айнан шу кийимлардан янгилик ҳосил қилиш учун кофта устидан топик ёки оддийгина нимча кийиш кифоя. Шунингдек, жинси ёки бошқа матодаги шимлар учун баланд пошнали оёқ кийим кийиш тавсия этилади. Баланд пошнали туфлилар аёлнинг қоматини гўзал кўрсатибгина қолмай, ўзига бўлган ишончни орттиради.
Занжирли тасма
Агар иш жойи қатъий режимда расмий кийиниш услубини талаб этса, бунинг ҳам ажойиб йўли бор. Расмий услуб ҳисобланган костюм-шим ёки костюм-юбкага биргина аксессуар қўшиб, замонавий кўринишга эга бўлиш мумкин. Масалан, костюм устидан белни таъкидлаш учун тақилган тасманинг ён қисмига махсус занжир орқали безак берилса, ажойиб образ пайдо бўлади. Ушбу либос ва аксессуар ёрдамида мода ҳам, ишдаги тартиб-қоида ҳам бузилмайди.
Юқори қисм учун енг
Бу нафақат кўринишни мураккаб ва қизиқарли бўлишига, балки салқин кузда исинишга ҳам ёрдам беради. Тепа қисми билан бирга тикилган енгни елкаси очиқ либослар билан бирга кийиш кузги мавсум учун ажойиб янги либосни ҳосил қилади.
Трикотаж нимча
Куз мавсуми учун яна бир ажойиб топилма − мактаб даврида кийилган трикотаж нимчалар. Уни битта катта ўлчамдаги кўйлак билан кийиш янада ажойиб услубни яратади. Нимча енгидан ва тагидан чиқиб турган кўйлак ҳам замонавий кўринишнинг бир белгисидир.
Шарф ўрнига жемпер
Ҳаво бироз салқин шарф ўрнини босувчи оддийгина трикотаж жемпердан фойдаланишнинг айни вақти. Уни плаш ёки куртка устидан ҳам шунчаки ташлаб, узун қўлларини бўйинга ўтказиб олиш тавсия этилади. Шунингдек, жемперни кўйлаклар устидан ҳам шарф сифатида қўллаш мумкин.
Ўтказмали чарм камар
Кўзга ташланиб турувчи кенг камарлар, албатта, ҳар бир либосга ўзгача кўриниш беради. Бундай белбоғлар нафақат белни таъкидлаш, балки катта ҳажмдаги либосларни қисқартириш учун ҳам хизмат қилади. Уларни қалин кийим – куртка, палто, кардиганлар билан ҳам тақиш мумкин. Ушбу имкониятдан фойдаланган ҳолда янги услубда кўриниш мумкин.
Тиззадан юқори пайпоқ
Айни кунларда бироз қўпол ва катта ҳажмдаги пойабзаллар модага кириб келмоқда. Бундай оёқ кийимлар учун тиззагача кўтариладиган пайпоқ кийиш ажойиб қўшимча ҳисобланади. Шу билан бирга, ушбу услуб оёқларни узун ва тўпиқларни ингичка қилиб кўрсатади.
Изоҳ (0)