Қоматни ихчам кўрсатадиган кузги кўйлак фасонлари (фото)

Брендлар томонидан тақдим қилинган кузги коллекциялардаги қоматни ихчам кўрсатиб, белга урғу берадиган моделлар сурати билан бўлишамиз.

H&M

H&M бренди томонидан тақдим қилинган мазкур модель белга алоҳида урғу беради. Бел қисмидаги белбоғ ва тўғри бичимли этак узунлиги сабаб эса силуэт узунроқ кўринади. Либоснинг оч рангда экани уни бошқа ранг ва принтлар билан мослаш имконини беради. Аксессуарлардан жигарранг, олчаранг ва тўқ яшил тақинчоқлар ёки бош учун бахмал ҳамда атлас матоли ободок ва деталлардан фойдаланиш мумкин. Унинг устидан узун жилет, чарм куртка ва кенг пальто ҳамда классик услубдаги тренч кийса бўлади.

EMKA

Ўсимлик принти туширилган, оч рангли мазкур либос аёллар эгнида яна ҳам чиройли кўринади. Уни баланд «казаки», этик ва оч кроссовка ва кета билан мослаш мумкин. Ингичка занжирли тақинчоқ билан эса моделнинг бўйин қисмига урғу берса бўлади. Либосни кенг пиджак, куртка билан мослаш, оқшом учрашувлари учун эса катта ва йирик зирак, ободок ва мини сумка билан образ яратиш тавсия қилинади.

«Снежная королева»

«Снежная королева» бренди томонидан тақдим қилинган футляр бичимли либос бел қисми ингичка бўлмаган аёллар учун энг яхши вариант. Миди узунлигидаги пиджак-кўйлакни офисга ва кундаликка ҳам кийиш мумкин. Унинг ўзини ёки водолазка ва жемфер билан кийса бўлади. Пойабзаллардан ёпиқ пошнали туфли, ботфорт ва ботильонлар танлаш мумкин. Белбоғини бошқа рангдаги камар билан алмаштириш орқали белга янада урғу берилади. Ободок, минимал услубидаги тақинчоқ билан образни уйғунлаштириш тавсия қилинади.

Uniqlo

Аёл киши қоматини ҳеч қандай модель «запах» бичимли либосчалик чиройли кўрсатмайди. Uniqlo томонидан тақдим қилинган табиий ипак матосидан тикилган моделнинг тўқ қизил ранги кузги гардероб учун айни муддао.Қулай ва замонавий образ яратиш учун мазкур либос билан бичими эркакларникидек бўлган пиджак ва «гармошка» этик , устки кийимдан тренч ёки узун пальто кийинг. Либосни турли камарлар билан мосласа бўлади, унинг V шаклини эсга соладиган олд қисми эса тақинчоқ ва аксессуарлар билан эксперимент қилиш имконини беради.

Zara

Zara’нинг ушбу либоси минимал услубни яхши кўрадиганлар учун мақбул танлов. Унинг бел қисми ва енгининг бичими силуэтни чиройли кўрсатади. Либосни катта ҳажмли кроссовка, боғичли ботинка ҳамда ботфорт ва туфли билан кийса бўлади. Ноодатий услубда кийинишни истайдиганлар уни шим ва баланд бўлмаган пошнали пойабзал билан кийиши мумкин.

Shein

Юбкаси қалам бичимли, олд қисми эса «запах»ли мазкур либосни кийиш орқали қоматни жозибали кўринишига эга бўлиши мумкин. Аксессуарлар ва пойабзал танланишига қараб либосни кундалик иш учун, офис ёки оқшом тадбирларига кийса бўлади. Масалан, офис учун уни ёпиқ туфли, ботильон ва жиддий услубдаги сумка билан, романтик образ учун эса ялтироқ туфли, пошнали босоножка ва ёрқин сумка билан кийиш керак. Кундалик учрашувлар учун эса кроссовка ва жинси куртка билан кийиш тавсия қилинади.