Гардероб учун миллион: Кейт Миддлтоннинг энг қиммат образлари (фото)

Zara, Topshop, Asos ва Gap сингари чўнтак кўтарадиган брендлар либосларини ҳам кийиши сир бўлмаган Кейт Миддлтоннинг кийиниш услуби мода танқидчилари ва ихлосмандларини мафтун қилиб келади. Гап шундаки, у қаерга қандай кийинишни билади, гардеробига назар ташланса, 200 долларлик шим, шу билан бирга, 15 минг долларлик либосни ҳам учратиш мумкин. Қуйида малика энг кўп пул сарфлаган образларини тақдим қиламиз.

Emilia Wickstead — 1112 долларлик катак принтли юбка

Кейт Emilia Wickstead брендидан плиссировка бичимли юбкани Кенсингтондаги рождество оқшомига кийган. Уни Брора брендининг 266 долларлик қора кашемирдан тикилган кардиган билан мослаган.

Sportmax брендидан 1200 долларлик фируза рангли пальто

Блекпулга ташриф учун Миддлтон Италиянинг Sportmax брендидан 1200 долларлик фируза рангли пальто, Michael Kors’дан принтли кўйлак ҳамда Manu Atelie брендининг 570 долларлик сумкасини танлаган. Бутун образ учун малика 2065 доллар сарфлаган.

Gucci брендидан лаванда рангли блузка — 1300 доллар

Малика Gucci’дан 1300 долларлик блузка билан Jigsaw брендидан 170 долларлик шим ва Aspinal’нинг 650 долларлик сумкасини мослашни афзал билган.

Emilia Wickstead брендидан 1285 долларлик лимон рангли либос

Emilia Wickstead’нинг лимон рангли либосини герцогиня 2013 йилда Букингем саройидаги зиёфатга кийиш учун танлаган. Jane Corbett шляпаси ва тилла деталлар билан безатилган клатч образни янада башанг кўринишига сабаб бўлган.

Missoni брендидан 2480 долларлик, миди узнлигидаги плиссировкали либос

Кейт Шимолий Ирландияга ташриф учун Missoni брендидан 2480 долларлик, миди узунлигидаги плиссировкали либосни танлаган ва уни оч жигарранг, учли туфли билан мослаган.

Elie Saab’дан 3100 долларлик ҳаворанг кўйлак

Айнан мазкур образ Кейтнинг энг эсда қоларли образлардан бири ҳисобланади. Elie Saab’дан 3100 долларлик ҳаворанг кўйлак билан Philip Treacy’нинг шляпаси ва Kiki McDonough зиракларини мослаган маликага мода экспертлари томонидан ижобий фикрлар билдирилган.

Alexander McQueen’нинг 3259 долларлик оқ гипюр либоси

Герцогиня 2017 йилда Royal Ascot’га кийиш учун Alexander McQueen брендидан либос танлаган ва уни шляпа, зирак, клатч ва Gianvito Rossi’нинг туфлиси билан мослаган. Мазкур образ умумий 3259 долларга тушган.

Alexander McQueen 4000 долларлик пальто

Авлиё Патрик кунининг асосий ранги яшил ҳисобланади ва шу боис ҳам Кейт ҳар йили ушбу тадбирда иштирок этиш учун шу рангли кийим танлайди. Суратдаги Alexander McQueen томонидан тақдим қилинган классик бичимли пальто нархи 4000 долларни ташкил этади. У образни Gianvito Rossi’дан 676 долларлик туфли билан якунлаган.

Catherine Walker брендидан 4000 долларлик сут рангли пальто

Герцогиня 2016 йилда Канадага ташрифи учун Catherine Walker’дан 4000 долларлик пальто, Л.К. Беннет томонидан тақдим қилинган туфли ва аксессуарларни танлаган.

Jenny Packham’дан 4684 долларлик кўйлак

Royal Variety иштироки учун Миддлтон қимматбаҳо тошлар билан безатилган Jenny Packham’дан 4684 долларлик кўйлакни танлаган.

Emilia Wickstead’дан 6022 долларлик оч кўк либос

2017 йилнинг май ойида Кейт Люксембургга Emilia Wickstead’дан 6022 долларлик либосда, Kiki McDonough зиракларини таққан ҳолда ташриф буюрган.

Alexander McQueen’дан 6211 долларлик қора либос

Кейт ҳам ҳар бир аёлнинг гардеробида қора рангли либос бўлиши керак, деган қоидага амал қилади. У қора классик бичимли либоси билан 6000 долларлик сумка тақишни маъқул кўрган.

Chanel томонидан тақдим қилинган 10 000 долларлик образ

Кейт 2017 йилда Парижга сафари давомида бошдан оёқ Chanel’дан кийинган. Тотал-лук нархи 10 минг долларни ташкил қилган.

Alexander McQueen’дан 10 605 долларлик узун либос

БАFTA Awards’даги иштироки учун герцогиня Alexander McQueen либосини танлаган. 2019 йилда айнан шу образда Portrait Gala’да ҳам иштирок этган.

Alexander McQueen’дан 14 000 долларлик либос

Синглисининг тўйида яна Alexander McQueen’дан либос танлаган Кейт образни Jane Taylor шляпаси билан мослаган.

Alexander McQueen’дан 332 000 долларлик тўй либоси

Герцогиня алоҳида кунлар учун Alexander McQueen’дан либос кияди. Дизайнер Сара Бертон томонидан тикилган тўй либоси унинг либослари орасидаги энг қиммат ва ҳашаматлиси эканига шубҳа йўқ. Никоҳ либоси маликага 332 000 долларга тушган.