«Сантос» Робиньо билан шартномани бекор қилди. У клуб билан 6 кун олдин шартнома имзолаганди

«Сантос» томонларнинг ўзаро келишувига биноан Робиньо билан шартнома бекор қилинганлигини эълон қилди.

Бразилия клуби 11 октябрь куни «Реал», «Милан» ва «Манчестер Сити» собиқ ҳужумчиси билан шартнома имзолаганди.

Клуб расмий сайтига кўра, бу ҳаракат футболчининг жинсий зўравонлик иши бўйича суд жараёнида ўз ҳимоясига эътибор қаратиши учун амалга оширилган.

Эслатиб ўтамиз, 2020 йил ноябрида Робиньо жинсий зўравонлик учун тўққиз йилга озодликдан маҳрум қилинган эди. Ҳодиса 2013 йилнинг 22 январида Миланда содир бўлган. 2017 йилнинг 23 ноябрида Милан суди 33 ёшли футболчи ва яна беш кишини 22 ёшли албаниялик қизни зўрлашда айбдор деб топганди. Робиньо эса ўзининг айбсиз эканини ва суд ҳукми устидан шикоят қилишини айтган.

Маълумот учун, Робиньо ўтган мавсумда «Истанбул Башакшекир» жамоасида тўп сурди. Бразилиялик форвард Туркия чемпионатининг 25 учрашувида майдонга тушиб, бирор марта ҳам самарали ҳаракатни амалга оширмади.