Craigslist сайтида 1985 йилда ишлаб чиқарилган ноодатий Subaru сотувга қўйилгани тўғрисида эълон пайдо бўлди. Яшил рангли пикап Lamborghini суперкарлариникига ўхшаш эшикларга ва пикник учун мўлжалланган столга эга. Сўнгги 15 йил давомида мазкур автомобилга эгалик қилган инсон уни 14,9 минг долларга сотишни режалаштирмоқда, деб хабар беради Motor.
Афтидан, пикап эгаси яшил рангнинг ишқибози бўлган, чунки машинанинг нафақат кузови, балки салони ҳам шу рангда. Салондаги деярли барча жиҳозлар яшил рангда — ўриндиқлар қопламасидан тортиб эшиклар, орқани кўришга мўлжалланган ойнага илинган кубикларгача. Ҳатто Subaru ғилдиракларидаги оригинал «шилдиклар» ҳам яшил рангли муқобилига алмаштирилган.
Эътиборни тортадиган жиҳати, юк платформасидан пикник учун алоҳида жой ўрин олган: у ерда стол ва бир жуфт ўриндиқ ўрнатилган. Ўриндиқлар ёнидаги тутқичларга кўра, коктейлни ҳаракат вақтида ҳам ичиш мумкинлигини пайқаш мумкин.
Subaru Brat GL тўрт цилиндрга эга 1,8 литрли оппозит двигатель билан жиҳозланган бўлиб, у механик узатмалар қутиси ёрдамида бошқарилади. Машина ҳозирга қадар 146,5 минг километр йўл босган.
Эслатиб ўтамиз, август ойида Чикагода дарахт томонидан яксон этилган Subaru Forester ёдгорликка айлантирилган эди.
Изоҳ (0)