«Перископли» ноёб Lamborghini миллион доллар нархида сотувга қўйилди

Gooding & Company аукциони орқали ноёб Lamborghini Countach LP400 Periscopica сотувга қўйилди. Перископли орқа ойнага эга суперкар нархи 900 минг доллардан бошланади, деб хабар беради Motor.

Lamborghini Countach LP400 1971 йили Женева автосалонида тақдим этилган. Қиррали модель ўзидан олдинги суперкарлардан дизайни билан ажралиб туради. Бироқ ноёб Lamborghini’ни яратган афсонавий дизайнер Марчелло Гандини бу каби шакл суперкарларнинг ривожланиш векторига айланишини ўн йиллар олдин белгилаб берган.

Lamborghini Countach марка тарихида биринчи бор бўйлама жойлашган двигателга эга бўлган. Шу сабабли муҳандислар ҳайдовчи орқа томонни кўра олишини таъминлайдиган кузовни ўйлаб топган. Мутахассислар перископ услубида яратилган ноёб орқа ойна шаклини яратган. Шу сабабли модель Periscopica дейилади.

Аукционга қўйилган нусха конвейрдан 1975 йилда чиққан. Италия маркаси Countach Periscopica’дан жами 158 нусха яратган. Суперкар Blue Metallizatto рангига бўялган бўлиб, уни Саудия Арабистонидан бўлган коллекционер сотиб олган. Орадан бир неча йил ўтгач, модель АҚШга жўнатилган, кейинроқ Европадаги ҳозирги эгасининг қўлига келиб тушган. Суперкар 45 йил давомида қанча йўл босгани номаълум.

Lamborghini Countach Periscopica 370 от кучига эга 3,9 литрли V12 атмосфера двигатели ёрдамида ҳаракатга келади. Агрегат беш поғонали механик узатмалар қутиси ёрдамида бошқарилади. Суперкар соатига 100 километр тезликка беш сониядан камроқ вақт ичида эриша олади. Максимал тезлиги — 316 км/соат.

Аукцион 26—30 октябрь кунлари бўлиб ўтади. Ташкилотчилар ноёб суперкарни 900 мингдан 1,1 миллион доллар атрофида сотишни режалаштирмоқда.