Дунё бўйича коронавирус инфекцияси асоратлари оқибатида вафот этганлар сони 1,1 миллион кишидан ошди. Бу ҳақда касалланиш статистикасини реал вақт режимида кузатиб бораётган Жонс Ҳопкинс университети маълумотларида келтирилган.
Ҳозирга қадар бутун дунёда 39 миллион 68 мингдан ортиқ кишида коронавирус аниқланган бўлиб, уларнинг қарийб 27 миллиони соғайган (68,9 фоизи).
Энг кўп ўлим ҳолатлари АҚШ (218 минг киши), Бразилия (153 минг киши) ва Ҳиндистонда (112 минг киши) қайд этилган.
Касалланиш кўрсаткичи бўйича АҚШ ҳамон етакчи бўлиб турибди — COVID-19’ни юқтириб олиш билан боғлиқ 8 миллиондан ортиқ ҳолат қайд этилган. Иккинчи ўринда Ҳиндистон (7,3 миллион бемор), учинчи ўринда эса Бразилия (5,2 миллион бемор).
Аввалроқ Россияда биринчи марта сутка давомида коронавирусга чалинганлар сони 15 минг кишидан ошгани тўғрисида хабар берилганди.
Ўзбекистон Соғлиқни сақлаш вазирлигининг 16 октябрь соат 23:55 даги маълумотларига кўра, мамлакатда ҳозирга қадар жами 62 684 кишида COVID-19 аниқланган бўлиб, уларнинг 59 756 нафари соғайган.
Изоҳ (0)