Украинада маҳаллий кенгашларга сайловлар куни участкаларда бешта муҳим масала юзасидан жамоатчилик фикрини ўрганишга қаратилган мамлакат миқёсидаги сўровнома ўтказилади. Украина президенти Владимир Зеленский ушбу муҳокама ўтказилишини тасдиқлаган ва 16 октябрь куни аввал ошкор қилинмаган уч асосий масала қайси эканига тўхталган. Бу ҳақда Unian агентлиги хабар тарқатди.
Украина фуқаролари жавоб бериши керак бўлган саволлар тиббиёт каннабиси етиштириш ва сотишни қонунийлаштириш, парламент таркиби ва ядро қуролидан воз кечишга қаратилган Будапешт шартномаси талабларини бажариш масалаларини қамраб олган.
- Олий Рада депутатлари сонини 300 нафаргача қисқартириш керакми?
- Сиз Украинада оғир аҳволдаги беморларни даволаш мақсадида тиббиёт каннабисини етиштириш ва сотишни қонунийлаштиришни қўллаб-қувватлайсизми?
- Украина Будапешт келишуви билан белгилаб қўйилган хавфсизлик кафолатларидан халқаро даражада фойдаланиши керакми?
Аввалроқ Зеленский дастлабки икки савол ҳақида гапирган, улар коррупция жинояти учун умрбод қамоқ жазосини қўллаш ҳамда Донбассда эркин иқтисодий зонани ташкил этиш масалаларини қамраб олган.
Зеленский беш муҳим масала бўйича аҳоли фикрини ўрганишга йўналтирилган мамлакат миқёсидаги сўровномани ўтказиш хусусида 13 октябрда гапирган ва буни тўғридан-тўғри демократия шаклларидан бири сифатида тан олишини айтганди.
«Мустақиллик тарихи давомида илк бора «Сиз нима деб ўйлайсиз?» деган саволни фуқароларга беряпмиз. Нима учун? Сизнинг жавобингиз биз учун муҳим. Сабаби Украина бу — сизлар, ҳаммаси сиз берган жавобларга қараб амалга оширилади», — деган Зеленский.
Украинада маҳаллий кенгашларга сайловлар ва Зеленский ташаббуси билан қилинаётган халқ сўровномаси 25 октябрда ўтказилади. Сўровнома жавоблари тўғридан-тўғри юридик кучга эга эмас.
Изоҳ (0)