Эрон Тоғли Қорабоғдаги низолар туфайли унинг чегарага яқин ҳудудларига келиб тушаётган жанговар снарядларга нисбатан жавоб муносабатини билдиради. Бу ҳақда мамлакат Ташқи ишлар вазирлиги вакили Саид Хатибзода маълум қилди, деб ёзади «РБК».
«Эрон Ислом Республикаси буни эътиборсиз қолдирмайди», — деди ТИВ вакили.
Унинг айтишича, низо ҳудудига чегарадош жойларда яшайдиган Эрон фуқароларининг хавфсизлиги мамлакат қуролли кучлари учун бирламчи омиллардан биридир.
Хатибзоданинг таъкидлашича, ўтган кун мобайнида мамлакатнинг чегарадош ҳудудларига бир нечта жанговар ракеталар келиб тушгани ҳақида хабарлар келган. У буни «мутлақо номақбул» вазият деб баҳолади.
Эроннинг Шарқий Озарбайжон вилояти Ходафарин тумани губернатори Али Амирад жанговар ракеталар ҳудуддаги бир нечта қишлоқларга тушганини, оқибатда битта турар жой вайрон бўлгани ва бир киши жароҳатланганини маълум қилди.
7 октябрь куни Эрон Боку ва Еревандаги ҳукуматларга норозилик ноталарини юборган эди. Бунга Эронга бир нечта артиллерия снарядлари ва ракеталар келиб тушгани сабаб бўлган. Шундан кейин Озарбайжон вакиллари Эрон ҳудудига тасодифан ўт очгани учун узр сўради.
Шу билан бирга, аввалроқ Эрон мудофаа вазири бригада генерали Амир Ҳотамий бундай ҳолат қайталанса, Теҳрон огоҳлантиришлар билан чекланмаслиги ҳақида таҳдид қилган эди.
Тоғли Қорабоғда кенг қамровли жанговар ҳаракатлар 27 сентябрдан буён давом этмоқда. Бу минтақадаги сўнгги ўн йилликда кузатилган энг жиддий тўқнашув бўлмоқда.
Изоҳ (0)