16-oktabr kuni Toshkent shahar ma’muriy sudida UzAutoMotors AJning O‘zbekiston Respublikasi Monopoliyaga qarshi kurashish qo‘mitasi maxsus komissiyasining 21/31-sonli ishiga oid 2020-yil 19-avgustdagi qarorini haqiqiy emas deb topish to‘g‘risidagi shikoyat arizasini ko‘rib chiqish bo‘yicha o‘tkazilayotgan sud jarayoni davom ettirildi, deya xabar qildi Oliy sud axborot xizmati.
Oliy sud axborotiga ko‘ra ushbu ma’muriy ish sudya G‘.Davlatov raisligida ko‘rilmoqda.
“Sud o‘z ishini ochiq sud majlisida davom ettirib, dastlab arizachi UzAutoMotors AJ vakili tomonidan fikr bildirildi, ya’ni jamiyatda o‘tkazilgan tekshirishga asos bo‘lgan ma’lumotnomani shakllantirishda narxlar noto‘g‘ri kiritilganligi, ya’ni misol uchun Ravon rusumli avtomashinaning boshqa davlatlardagi savdo majmualarida 2015–2016-yillardagi narxlari internet tarmog‘idan asos sifatida olinganligini hamda Monopoliyaga qarshi kurashish qo‘mitasi huzurida 3 ta maxsus komissiya faoliyat ko‘rsatsa-da, ushbu masala faoliyat doirasiga kirmaydigan maxsus komissiya tomonidan ko‘rib chiqilganligi bildirildi.
Qo‘mita vakillari ham e’tirozlarini bildirib, avtomashinalarning narxi haqiqatan ham internet tarmoqlari orqali olinganligi, shuningdek, hozirgi kundagi narxlar ham o‘rganilganligi, bugungi kunda ham mazkur narxlarni solishtirib ko‘rilishi mumkinligi ma’lum qilindi.
Shuningdek, ular qo‘mitada haqiqatan ham 3 ta maxsus komissiya mavjudligini bildirgan. Amaldagi nizom talabiga binoan o‘z faoliyatini boshlagan komissiya boshqa komissiya faoliyatiga bog‘liq masala ko‘rilganida ham ushbu ishni ko‘rib chiqishi mumkinligi belgilanganligini ma’lum qilgan.
Shu bilan birga, taraflar tomonidan ariza yuzasidan o‘z fikr-mulohazalarini bildirganidan so‘ng, sud UzAutoMotors aksiyadorlik jamiyati tomonidan keltirilgan, ya’ni jamiyat tomonidan ishlab chiqariladigan mahsulotlarning tannarxi shakllantirilishi metodikasini yopiq sud majlisida o‘tkazish to‘g‘risidagi iltimosnoma muhokamasiga o‘tgan.
Mazkur iltimosnoma taraflar o‘rtasida muhokama qilinganidan so‘ng, sud maslahatxonadan chiqib, sud ajrimini o‘qib eshittirdi.
Ajrimga ko‘ra, sud majlisining Monopoliyaga qarshi kurashish qo‘mitasi tomonidan o‘tkazilgan tekshirishda jamiyatda ishlab chiqariladigan mahsulotlarni tannarxi yuqori baholanganligi to‘g‘risida ko‘rsatilgan holatlar muhokamasini yopiq sud majlisida o‘tkazish belgilandi. Yopiq sud majlisida sud muhokamasi o‘rnatilgan tartibda davom etdi va taraflarning barcha vajlari tinglandi.
Navbatdagi sud majlisi 2020-yil 23-oktabr kuni soat 10:00 da o‘tkaziladi”, – deyiladi Oliy sud xabarida.
2020-yil 9-oktabrda o‘tkazilgan sud majlisida UzAuto Motors navbatdagi sud ishida tovarlar narxini shakllantirishda maxfiy hujjatlarga asoslanganini bildirgan.
Eslatib o‘tamiz, deputat Rasul Kusherbayevning tanqidlari ortidan Monopoliyaga qarshi kurashish qo‘mitasi UzAuto Motors AJga nisbatan ish qo‘zg‘atgan edi. Qo‘mita kompaniya tomonidan “Raqobat to‘g‘risida”gi qonunni buzish alomatlarini aniqlagan.
Qo‘mitaning 2020-yil 19-avgust kuni o‘tkazilgan yig‘ilishida maxsus komissiya tomonidan o‘tkazilgan tekshiruvlar kompaniya avtomobil narxlarini asossiz oshirganini tasdiqlagan. Unga ko‘ra, avtomobillar narxi 3 million so‘mdan 19 million so‘mgacha asossiz oshirilgani aniqlangan.
Mazkur o‘rganish natijalari omma uchun e’lon qilingach UzAuto Motors Monopoliyaga qarshi kurashish qo‘mitasi qoshidagi maxsus komissiya qabul qilgan qaror ustidan sudga shikoyat qilishini bildirgandi va keyinroq kompaniya Toshkent shahar ma’muriy sudiga shikoyat qilgani ma’lum bo‘lgandi.
Izoh (0)