Япониялик йигит Перудаги Мачу-Пикчуни томоша қилиш учун пандемия сабабли 7 ой кутди. Перу ҳукумати фақат унинг ўзи учун шаҳарни очди

Япониялик 26 ёшли бокс мураббийи Жесси Катаяма Перудаги қадимий Мачу-Пикчу шаҳрига боришни ва уни томоша қилишни орзу қилган. Йигит 2020 йилнинг 14 мартида Мачу-Пикчунинг яқинида жойлашган Агуас-Калентес шаҳрига етиб келган. Катаяма қадимий шаҳарни томоша қилиш учун 16 март санасига чипта сотиб олган, бироқ кейинроқ Перу ҳукумати коронавирус пандемияси сабабли ёдгорликни ёпганини билган, деб ёзмоқда Meduza.

Чегаралар ёпилгани сабабли йигит Японияга қайтиб кета олмаган. Катаяма Перуда бир неча кун қолишини режа қилиб, Агуас-Калентесда кичик хонани ижарага олган. Йигит бу хонада етти ой яшади.

Ҳар куни Катаяма югуришга чиққан ва Мачу-Пикчуни узоқдан томоша қилган. Унинг сўзларига кўра, юзага келган вазиятдан у хафа бўлмаган. Катаяма Перу бўйлаб саёҳат қилган, Путукуси тоғига борган, шаршараларни томоша қилган. Бундан ташқари, Катаяма Агуас-Калентесда яшовчилар билан дўстлашган, маҳаллий болалар учун бокс дарсларини ҳам ўтган.

Японияликнинг пули деярли тугаганда у уйга қайтиши кераклигини тушунган. Бироқ Катаяма Мачу-Пикчуга кириш умидини сўндирмаган. Шундан кейин у сайёҳлик компаниясига мурожаат қилган ва ўз тарихини айтиб берган.

Ўз навбатида, сайёҳлик фирмаси Перу Маданият вазирлигининг ёрдамини қўлга киритишга муваффақ бўлган. Шу туфайли Катаямага ёпилган Мачу-Пикчуни томоша қилиш учун махсус рухсатнома берилган. Катаяма билан бирга қадимий шаҳарни айланиш учун археологик комплекс директори ва икки нафар фотограф йўлга чиққан. Шу тариқа, япониялик сайёҳ етти ой ичида Мачу-Пикчуга ташриф буюрган биринчи сайёҳ ва шаҳарни одамларсиз томоша қилган кам сонли кишилардан бири бўлди.

Катаяманинг маълум қилишича, у 16 октябрь куни Японияга қайтишни режалаштирмоқда. Унинг сўзларига кўра, маҳаллий аҳоли билан хайрлашиш оғир бўлади. Баъзи болалар эса Катаяма билан хайрлашиш олдидан унинг суратини чизган ва у учун ўйинчоқлар ясаган.

Перу ҳукумати яқин вақт ичида Мачу-Пикчуни сайёҳлар учун очишни режалаштирмоқда, бироқ ташриф буюрувчилар сони одатдаги миқдорнинг 30 фоизини ташкил қилади. Қадимий шаҳар очилишининг санаси ҳозирча номаълум.