Россиянинг «Вектор» вирусология ва биотехнология давлат илмий маркази мамлакатдаги коронавирусга қарши иккинчи вакцинани рўйхатдан ўтказди. Вакцина «ЭпиВакКорона» номини олган. Бу ҳақда Россия президенти Владимир Путин ҳукумат аъзолари билан бўлиб ўтган йиғилишда маълум қилди, деб ёзмоқда Meduza.
«Билишимча, бизда яна учинчи вакцина ҳам тайёр бўлмоқда — Россия Фанлар академиясининг Чумаков номидаги маркази томонидан», — дея қўшимча қилган Путин.
Россия бош вазири ўринбосари Татьяна Голикованинг маълум қилишича, «ЭпиВакКорона» вакцинасининг рўйхатдан ўтказилганидан кейинги синовлари яқин вақт ичида 40 минг нафар кўнгиллида ўтказилади. Уларнинг орасида 150 киши 60 ёшдан катталар бўлади.
Вакцина рўйхатга олингани ҳақидаги гувоҳномага кўра, у 2021 йил 1 январдан бошлаб аҳоли томонидан қабул қилиниши учун чиқарилади. Вакцина мушак остига жўнатиладиган суспензия шаклида ишлаб чиқилади.
Вакцинанинг 60 минг дозадан иборат биринчи партиясини яқин вақт ичида ишлаб чиқариш режалаштирилмоқда.
Аввалроқ «ЭпиВакКорона» вакцинаси учун патент олингани ҳақида хабар берилганди.
Эслатиб ўтамиз, Россияда патентланган ва рўйхатга олинган COVID-19’га қарши биринчи вакцина Гамалея номидаги эпидемиология ва микробиология маркази томонидан яратилган «Спутник-V» вакцинаси ҳисобланади. Унинг синовлари ҳали тўлиқ якунига етмаган.
Сентябрь ойида Россия Соғлиқни сақлаш вазирлиги коронавирусга қарши учинчи вакцинанинг синовларига рухсат берди. Мазкур вакцина Россия Фанлар академиясининг Чумаков номидаги иммунобиологик дорилар яратиш ва тадқиқ қилиш илмий маркази томонидан яратилган.
Аввалроқ Ўзбекистон «Вектор» илмий маркази томонидан ишлаб чиқарилган мазкур вакцина рўйхатдан ўтказилгандан сўнг унинг қўшма синовларини ўтказишга қизиқиш билдирганди. Шунингдек, Ўзбекистон «Спутник-V» вакцинасининг 5000 дозасини ажратиш юзасидан Россиянинг тўғридан-тўғри инвестициялар жамғармасига мурожаат қилган.
Изоҳ (0)