Қирғизистон ташқи ишлар вазири Ўзбекистон элчиси билан учрашувда мамлакатдаги сиёсий вазият барқарорлашганини маълум қилди

Қирғизистон ташқи ишлар вазири Руслан Kaзaнбаев Ўзбекистоннинг Қирғизистондаги элчиси Хуршид Мирзоҳидовни қабул қилди. Бу ҳақда Қирғизистон Ташқи ишлар вазирлиги хабар берди.

Вазирлик хабарига кўра, суҳбат аввалида Ўзбекистон элчиси Руслан Kaзaнбаевни мазкур лавозимга тайинлангани билан табриклади, унга муваффақиятлар тилади, шунингдек, Ўзбекистон ташқи ишлар вазири Абдулазиз Комиловнинг табрикларини етказди.

Ўз навбатида, Руслан Kaзaнбаев Ўзбекистон элчисига мамлакатдаги вазият ҳақида маълумот берди. Вазирнинг маълум қилишича, мамлакатдаги сиёсий вазият барқарорлашган. Шунингдек, вазир Қирғизистон парламентининг янги спикери сайлангани, бош вазир ва ҳукумат аъзолари тайинланганини маълум қилди.

Учрашув чоғида томонлар икки томонлама ҳамкорликнинг долзарб йўналишлари ва истиқболлари юзасидан фикр алмашди, шунингдек, минтақавий ва халқаро ташкилотлар доирасида ҳамкорликни мустаҳкамлаш бўйича кейинги ҳаракатларни муҳокама қилди.

Руслан Kaзaнбаев аввал эришилган келишувларнинг тўлиқ амалга оширилиши муҳимлигини таъкидлади. Шу сабабли Руслан Kaзaнбаев яқин вақт ичида Ўзбекистон ташқи ишлар вазири Абдулазиз Комилов билан учрашишга тайёрлигини билдирди.

«Қирғизистон—Ўзбекистон давлат чегараларини делимитация ва демаркация қилиш бўйича музокаралар жараёни ва савдо-иқтисодий ҳамкорликка алоҳида эътибор қаратилди», — дейилади вазирлик хабарида.