Европа Иттифоқи Алексей Навальнийнинг заҳарлангани сабабли Россиянинг олти нафар мансабдор шахсига қарши санкция жорий қилди. Бу ҳақда Meduza хабар берди.
Санкциялар остига Федерал хавфсизлик хизмати директори Александр Бортников, Россия президентининг ички сиёсат бўйича бошқарма бошлиғи Андрей Ярин, президент администрацияси раҳбарининг биринчи ўринбосари Сергей Кириенко, мудофаа вазири ўринбосарлари Алексей Криворучко ва Павел Попов, шунингдек, президентнинг Сибир федерал округидаги ваколатли вакили Сергей Меняйло тушган.
Санкциялар Европа Иттифоқи ҳудудига киришни тақиқлаш ва иттифоқ ҳудудидаги активларни музлатишни назарда тутади.
Шу билан бирга, Россиянинг Органик кимё ва технологиялар давлат илмий-тадқиқот институтига қарши санкциялар жорий қилинган. Мазкур институтнинг бўлимларидан бирида Совет Иттифоқи даврида «Новичок» моддаси яратилган, деб ҳисобланади.
Буюк Британия ҳам Европа Иттифоқи каби Россияга санкциялар жорий қилишини билдирган.
Германия Ташқи ишлар вазирлиги агар германиялик шифокорлар томонидан Навальнийнинг таҳлилларида аниқланган «Новичок» Тақиқланган кимёвий қуроллар ташкилоти томонидан тасдиқланадиган бўлса, Навальнийни заҳарлагани учун Россияга қарши санкциялар муқаррар эканлигини маълум қилганди. Ташкилот Навальнийнинг таҳлил намуналарида «Новичок» моддаси бўлганини 6 октябрь куни тасдиқлаган.
Россия ташқи ишлар вазири Сергей Лавровнинг маълум қилишича, Россия жорий қилинган санкциялар учун Европа Иттифоқига жавоб қайтаради.
Аввалроқ Алексей Навальний ўзининг заҳарланишида президент Владимир Путин шахсан алоқадор, деб ҳисоблашини маълум қилганди. Россия ташқи ишлар вазирлиги эса сиёсатчининг заҳарланиши билан боғлиқ вазият саҳналаштирилган бўлиши мумкинлиги ҳақидаги тахминни илгари сурганди.
Изоҳ (0)