Қўлни мунтазам равишда совунлаб ювиш коронавирусга чалиниш эҳтимолини 36 фоизга камайтиради. Бу ҳақда ҳар йили 15 октябрда нишонланадиган Халқаро қўл ювиш куни муносабати билан «Роспотребнадзор» матбуот хизматида маълум қилинди, деб хабар бермоқда «РИА Новости».
«Қўлларни совунлаб ювиш вируснинг ташқи мембранасини бузади ва шу билан уни зарарсизлантиради. Тадқиқотнинг кўрсатишича, қўлларни мунтазам равишда совунлаб ювиш COVID-19 билан касалланиш эҳтимолини 36 фоизга камайтириши мумкин», — дейилади «Роспотребнадзор» хабарида.
Шунингдек, қўлларни совунлаб ювиш бошқа юқумли касалликлардан, масалан, вабо, Эбола, атипик пневмония ва гепатит E дан ҳимоя қилишга ёрдам бериши таъкидланган.
Бундан ташқари, қўлни ювиш ўткир ичак касалликлари хавфини 30-48 фоизга ва ўткир респираторли инфекциялар сонини 20 фоизга камайтириши мумкинлиги айтилган.
Мавзуга доир: Қўлни бир кунда неча маротаба ювиш керак?
Бундан аввал «Роспотребнадзор» коронавирусга чалинишнинг олдини олиш учун қўлларни исталган совунда ювиш мумкинлигини, чунки бу ҳолда оддий совун билан бактерияларга қарши совун самараси бир хил эканлигини билдирган.
Изоҳ (0)