Britaniyadagi bolalar kiyimlari savdosi bilan shug‘ullanuvchi onlayn do‘kon Instagram sahifasidan eng ko‘p daromad oluvchi eng yosh yulduzlar ro‘yxatini tuzdi. Aniqrog‘i, ota-onalar o‘z farzandining hisob raqamini boshqaradi, homiylik va yetakchi brendlar bilan hamkorlikdan millionlab dollar mablag‘ni qo‘lga kiritadi.

Everli Rouz Soutas LaBrant – 5 million obunachiga ega

Ro‘yxatning yuqori pog‘onasida Los-Anjelesning yetti yoshli fuqarosi – ko‘k ko‘zli Everli Rouz Soutas LaBrant turadi. Uning shaxsiy sahifasida 5 milliondan ortiq obunachi bor, shuningdek, Everlining YouTube kanali ham bor.

Qizining akkauntini moda-bloger va suratkash onasi Savanna LaBrant yuritadi. Everli bitta reklama postidan 10 199 dan 16 867 dollargacha pul topadi. Shuningdek, uning sahifasidagi har bir xabar o‘rtacha 590 mingdan ortiq layk to‘playdi.

Everlining bir yoshli Pozi Reyn LaBrant ismli singlisi bor. U tez-tez opasining sahifasida ko‘rinish beradi, ammo Pozining o‘zi ham Instagram foydalanuvchisiga aylangan. U allaqachon 1,7 million obunachiga ega. Odatda Everli va Pozi bir xil libosda suratga tushadi. Bundan tashqari, Everlining sahifasiga uning raqs videolari joylana boshlandi. 2020-yilning avgust oyida ularning oilasida Ziland ismli o‘g‘il dunyoga keldi va u hozircha Instagram’da 518 ming obunachiga ega bo‘ldi.

Ell Layvli MakBrum – 5 million obunachiga ega

Ro‘yxatning ikkinchi o‘rnini esa kanadalik aktrisa Ketrin Pays va amerikalik basketbolchi Ostin MakBrumning 4 yoshli qizi Ell Layvli MakBrum egalladi. Ellning sahifasi 5 million obunachiga ega va har bir post o‘rtacha 1 million layk to‘playdi hamda 10 000 dan 16 666 dollargacha daromad keltiradi.

LaBrant oilasining boshqa a’zolari ham Instagram sahifasiga ega. Ellning sahifasidagi bir yoshli singlisi Alayya ushbu ro‘yxatning 5-o‘rnini egallab turibdi, shuningdek, uch oylik ukasi Stilning allaqachon milliondan ortiq kuzatuvchisi bor.

Kichkintoy Ell singlisi va ukasi bilan suratga tushish hamda ota-onasiga tegishli bo‘lgan ichimlik brendini reklama qilishdan tashqari, xuddi Everli kabi o‘z raqslarining videosini joylashni boshladi. Ellning yaqinda pushti mo‘ynali kiyimda qora ko‘zoynak taqib, havorang Rolls-Royce’dan sakrab tushgani va ajoyib raqsi aks etgan videosi 3,5 milliondan ortiq kuzatuvchilar tomonidan tomosha qilingan.

Stofferlar oilasi – 3,5 million obunachiga ega

Arizona shtatidan kelgan besh yoshli Instagram yulduzlari — egizak opa-singillar Emma va Milaning onasi Keti Stofferda 3,5 million obunachi mavjud. Ketining ulardan tashqari uchta katta − Keytlin, Charlz va Finn ismli farzandlari bo‘lib, kichik qizi tug‘ilishidan bir necha yil oldin Instagram’dagi sahifasini yuritishni boshlagan, ammo u hozirgidek mashhurlikka erishmagan.

Biroq Emma va Mila tug‘ilishi bilanoq Ketining Instagram’i yashin tezligida “uchib ketdi”. Qizaloqlar nafaqat maftunkor qiyofasi, sertabassum yuzi, turli xil holati bilan, balki jiddiy mavzularni bir-biri bilan muhokama qilgan kulgili videolari sababli mashhurlikka erishdi.

Emma va Mila ishtirokidagi har bir post o‘rtacha 64 mingdan ortiq layk to‘playdi, agar xabarlarni reklama qilayotgan bo‘lsa, qizlar ota-onasiga 7081 dan 11 803 dollargacha daromad keltiradi. Yaqinda Stofferlar oilasi AQShning mashhur Walmart tarmog‘i bilan o‘z kiyim-kechaklar savdosini yo‘lga qo‘ydi.

Teytum va Oukli Fisher – 3 million obunachiga ega

Los-Anjelesda tug‘ilgan to‘rt yoshli egizak opa-singillar Teytum va Ouklining ota-onasi YouTube yulduzi sanalgan Medison Bontempo va Kayler Fisherning izidan bordi. Qizaloqlarning Instagram sahifasini 3 milliondan ortiq odam kuzatadi va har bir joylashtirilgan xabar 187 mingdan ortiq layk to‘playdi. Shuningdek, reklama postlari 6 213 dan 10 356 dollargacha daromad keltiradi.

Teytum va Ouklining sahifasi farishtalardek tabassum qilgan qizaloqlarning turli brenddagi bolalar kiyimini kiyib tushgan suratlar bilan to‘la. Yana bir yoshli qizi bor Medison va Kayler oilaviy YouTube kanalini boshqaradi va bu ham ularga yaxshi daromad keltiradi.

2020-yilning avgust oyida Fisherlar oilasida o‘g‘il tug‘ildi. Oliver Rett Fisher ismli chaqaloqning Instagramdagi sahifasida allaqachon 14 ming kuzatuvchisi bor.

Alayya Mari MakBrum – 2,8 million obunachiga ega

Bir yoshli Alayya opasi Ell MakBrumdan ortda qolmaydi – uning sahifasida 2,8 million obunachi bor. Har bir post 722 ming layk to‘playdi va ular qizaloqqa 5 612 dan 9 353 dollargacha daromad keltiradi. Alayyaning sahifasi u tug‘ilganiga ikki hafta bo‘lganida ochilgan.

Ava va Lea Klements – 1,8 million obunachiga ega

Los-Anjelesda istiqomat qiluvchi to‘qqiz yoshli Ava va Lea dunyodagi eng chiroyli egizak opa-singillar deya e’tirof etiladi. Ularning ota-onasi Jek va Kevin yuritadigan sahifa 1,8 million obunachiga ega. Jek egizaklari 6 oylik bo‘lganida ularni model qilmoqchi edi, ammo bu ish o‘xshamadi.

Biroq Instagramda buning uddasidan chiqdi. Egizaklar yetti yoshga to‘lgan kunida u qizlar uchun Instagram’da sahifa yaratdi va ular juda tez muvaffaqiyatli modellarga aylandi. Hozirda qizaloqlar bilan dunyoning yetakchi brend va reklama kompaniyalari shartnoma tuzadi. Ular har bir reklama postidan 3 558 dan 5 929 dollargacha daromad oladi.