Фарғона вилоятида фуқароларнинг жамоат жойларида карантин қоидаларига амал қилишини ва ниқоб тақиб юришини таъминлаш мақсадида ниқоб тақмаган фуқароларни видео ва фотофиксация орқали аниқлаш тизими жорий этилмоқда. Бу ҳақда Фарғона вилояти ИИБ ахборот хизмати хабар берди.
Маълум қилинишича, жамоат жойида ниқоб тақмагани учун фотосуратга олинган фуқаронинг шахси махсус база орқали аниқланади. Шундан сўнг ички ишлар органлари ва Давлат санитария ва эпидемиология маркази ходимлари томонидан маъмурий баённома тузилади.
Расмийлаштирилган баённома фуқаронинг уйига почта орқали юборилади. Ушбу тартиб Фарғона вилоятида 2020 йилнинг 17 октябридан амалиётга жорий қилинади.
Эслатиб ўтамиз, Маъмурий жавобгарлик тўғрисидаги кодекснинг 54-моддасига кўра, карантинли ва инсон учун хавфли бўлган бошқа юқумли касалликлар пайдо бўлиши ҳамда тарқалиши шароитида ваколатли органнинг махсус талабларига зид равишда жамоат жойларида ниқобсиз бўлиш базавий ҳисоблаш миқдорининг беш бараваригача миқдорда жарима солишга сабаб бўлади.
Изоҳ (0)