Ўзбекистонда пандемия даврида аҳоли ва тадбиркорларни қўллаб-қувватлаш, нархлар барқарорлигини таъминлаш мақсадида Солиқ кодексига қўшимчалар киритилмоқда. Бу ҳақда Олий Мажлис Қонунчилик палатаси депутати Расул Кушербаев ўзининг Telegram’даги канали орқали маълум қилди.
Янги қўшимчага асосан, 2020 йил 15 октябрдан бошлаб 2021 йил 1 январгача муддатга:
- Ўзбекистонга шакар ва шакар хом ашёсини олиб кириш, шунингдек, уни реализация қилиш айланмалари;
- 2021 йил 1 июлгача муддатга Ўзбекистонга картошка, ўсимлик ёғи, гўшт (мол гўшти, қўй гўшти, товуқ гўшти ва бошқалар), ҳайвонларни (қорамол ва парранда) тирик ҳолда ва уларни сўйишдан олинган маҳсулотларни олиб кириш, шунингдек, уларни реализация қилиш айланмалари қўшилган қиймат солиғидан (ҚҚС) озод қилиш кўзда тутилган.
Бу ўз ўрнида бозорларда ошиб бораётган ўсимлик ёғи, гўшт ва бошқа истеъмол маҳсулотларининг нархи пасайиб, барқарорлашишига олиб келиши зарур», — деб ёзади депутат.
Таъкидланишича, қонун лойиҳаси депутатлар томонидан қўллаб-қувватланган. Лойиҳани шу ҳафта сўнгида кутилаётган Сенат ялпи мажлисига киритиш режалаштирилган.
Ушбу қонун лойиҳаси депутатлар К.Эрназаров, М.Қурбонбоев, А.Умиров ташаббуси билан ишлаб чиқилган.
Эслатиб ўтамиз, шу йилнинг июль ойида Тошкент шаҳар давлат солиқ бошқармаси томонидан қўшилган қиймат солиғи тўловчиларга хизмат кўрсатишда замонавий ёндашувларни жорий этиш ва тезкор сервис хизматлари кўрсатиш мақсадида «Маслаҳат маркази» ташкил этилган эди.
Изоҳ (0)