O‘zbekiston bosh vaziri Abdulla Aripov Sadir Japarov nomiga Qirg‘iziston bosh vaziri etib tayinlangani munosabati bilan tabrik yo‘lladi. Bu haqda hukumat matbuot xizmati xabar berdi.
“Tabrik maktubida Qirg‘iz Respublikasi bosh vaziri Sadir Japarovga o‘zaro manfaatli hamkorlikni barcha yo‘nalishlarda kengaytirishiga, shuningdek, mamlakatlarimiz va xalqlarimiz manfaati uchun strategik sheriklikni yanada mustahkamlashiga umid bildirilgan”, — deyiladi xabarda.
Eslatib o‘tamiz, Qirg‘iziston parlamenti (Jo‘qorg‘i Keneshi) 4-oktabr kuni Sadir Japarov nomzodini mamlakat bosh vaziri lavozimiga tasdiqladi.
Qirg‘iziston parlamenti deputatlari “Mekenchil” (“Vatanparvar”) partiyasi asoschisi bo‘lgan Sadir Japarovni bosh vazir lavozimiga 10-oktabr kuni ham tasdiqlagan edi. Avvalgi bosh vazir Kubatbek Bo‘ronov mamlakatda parlament saylovidan keyin boshlangan namoyishlar va tartibsizliklar ortidan iste’foga chiqqandi.
Sadir Japarov 5-sentabr kuni namoyishchilar tomonidan Bishkekdagi qamoqxonalardan biridan ozod qilingan. U Qorako‘lda 2013-yilda mitinglar uyushtirgani hamda Issiqko‘l viloyati gubernatori Emilbek Kaptagayevni garovga olgani uchun 2018-yilda 11,5 yillik qamoq jazosiga hukm qilingan edi.
13-oktabr kuni prezident So‘ronbay Jeenbekov parlament qarori yuridik kuchga ega bo‘lishi uchun deputatlarning yetarli soni unga ovoz berishi kerakligini aytdi. Mamlakat parlamenti Jo‘qorg‘i Keneshda 120 ta deputatlik o‘rni borligi hisobga olinganda, qaror qabul qilish uchun kamida 61 nafar deputatning ovozi kerak edi.
So‘ronbay Jeenbekov respublika parlamentining yangi spikeri Kanat Isayevga murojaat qilib, Sadir Japarov rahbarligidagi hukumat tarkibini yana tasdiqlashni taklif qilgandi.
Deputat Miktibek Abdildayev yangi saylangan bosh vazir Sadir Japarovga qarshi qo‘zg‘atilgan jinoiy ish to‘g‘risida eslatib, u hali oqlanmaganini ta’kidlab o‘tdi. Sadir Japarov bunga javoban Oliy sud uning ishini qayta ko‘rib chiqish uchun qaytarganini, shu sababli u mahkum hisoblanmasligini bildirgan.
Izoh (0)