Россияда коронавирусга чалиниш ҳолатлари сони кейинги йилнинг февраль—март ойларига қадар 2020 йил июнь—июль ойларидаги корсаткичгача камаяди. «РБК»нинг хабар беришича, «Роспотребнадзор» Эпидемиология Марказий илмий-тадқиқот институти директорининг тадқиқот ишлари бўйича ўринбосари Александр Горелов «Россия 24» телеканали эфирида шундай прогноз қилган.
Унинг айтишича, COVID-19 билан касалланганлар сони камида яна «икки инкубация даври, яъни 28 кун» давомида ўсиб боради, шундан сўнг мамлакатда эпидемиологик вазият барқарорлаша бошлайди.
«Охирги барқарорлашув ва пасайиш босқичи, менинг фикримча, февраль—март ойларидан эрта бошланмайди», — деган Горелов. «Биз июнь—июль ойларида кузатган вазият февраль—март ойларида ҳам кузатилади», — дея қўшимча қилган у.
Айни пайтда Россияда коронавирусга чалиниш ҳолатлари сони ортиб бормоқда. 11 октябрь куни мамлакатда илк бор бир сутка давомида 13 мингдан зиёд COVID-19 билан касалланиш ҳолати қайд этилди. Шундай шароитда Россия касалхоналарида коронавирус билан оғриган беморлар учун жойлар тугамоқда, тез ёрдамни соатлаб, баъзан кунлаб кутишмоқда.
Мамлакат пойтахтида касалланиш ҳолат энг кўп бўлгани туфайли Москвада тиббиёт олийгоҳлари талабалари COVID-19’га қарши курашиш учун касалхоналарга чақирилмоқда. Бир ой ичида Москвада касалланиш ҳолатлари беш мартадан кўпроқ ўсди. Касалхоналарга энг оғир беморлар ётқизилмоқда.
«Роспотребнадзор» раҳбари Анна Попова Россияда касалланишнинг ортишини йилнинг совуқ мавсуми бошлангани билан боғлаган. Шунингдек, бунга таъсир қилувчи омиллар қаторига фуқароларнинг таътилдан ва ишга қайтганлигини киритган.
Изоҳ (0)