Александр Лукашенконинг президентлик сайловларидаги собиқ рақиби Светлана Тихановская Беларусь ҳукуматига «халқ ультиматум»ини эълон қилди, деб хабар бермоқда Meduza.
Тихановская «тузум»дан 13 кун ичида — 25 октябргача қуйидаги талабларни бажарилишини талаб қилди: Лукашенко истеъфога чиқиши ҳақида эълон қилиши лозим, тинч намойишчиларга қарши зўравонлик тўхтатилиши, сиёсий маҳбуслар озод этилиши керак.
Ушбу талаблар бажарилмаган тақдирда ҳукуматни намойишларнинг кучайиши кутаётганини таъкидлаган.
«Агар талабларимиз 25 октябрга қадар бажарилмаса, бутун мамлакат халқаро ультиматум билан кўчага чиқади. Ва 26 октябрда барча корхоналарда миллий иш ташлашлар, барча йўлларни тўсиб қўйиш, давлат дўконларидаги савдолар қулаши бошланади. Сизда учта шартни бажариш учун 13 кун муҳлат бор. Бизда эса тайёргарлик кўриш учун 13 кун бор ва шу вақт давомида беларусликлар ўзларининг тинч ва қатъиятли норозиликларини давом эттиради», — деган Тихановская.
Бундан аввал 10 октябрь куни Светлана Тихановская Беларусда май ойида ҳибсга олинган эри — блогер Сергей Тихановский билан телефонда суҳбатлашган. Бу эр-хотиннинг 134 кун ичида биринчи суҳбати бўлди. Тихановский турмуш ўртоғини «қаттиқроқ бўлишга» ундаган.
Шу куни Тихановский бошқа сиёсий маҳбуслар билан биргаликда Давлат хавфсизлик қўмитаси тергов ҳибсхонасида Александр Лукашенко билан учрашди. Президент улар билан конституцияга киритилиши мумкин бўлган ўзгартиришларни муҳокама қилиш учун учрашув ташаббуси билан чиқди.
Учрашувдан сўнг Светлана Тихановская «автомат ўқталган ҳолда ўтказилган диалог»га ишонмаслигини таъкидлади.
Эслатиб ўтамиз, Беларусда 9 август куни бўлиб ўтган сайловларни сохталаштириш ҳақидаги маълумотлар фонида норозилик намойишлари бошланди ва ҳалигача давом этмоқда. Намойишчилар Лукашенкони сайловни сохталаштиришда айбламоқда. Сайлов натижаларига кўра, Александр Лукашенко 80 фоиз овоз тўплаган.
Беларусь Марказий сайлов комиссияси маълумотларига кўра, Светлана Тихановская президентлик сайловида 10,1 фоиз овоз тўплаган. Тихановскаянинг ўзи эса мағлубиятини тан олмади ва ўзини «Беларусь халқи томонидан сайланган ягона етакчи» деб атади. Сайловдан икки кун ўтгач Тихановская Литвага чиқиб кетган. Унинг сафдошлари Тихановская ҳукумат босими остида мамлакатдан чиқиб кетганини маълум қилган.
Мухолифат Беларусда янги сайловлар ўтказиш ва конституциявий ислоҳотларни талаб қилмоқда.
Собиқ президентликка номзод Светлана Тихановскаянинг тарафдорлари 18 август куни янги сайловлар ўтказиш орқали мамлакатда ҳокимиятни транзит қилиш мақсадида Мувофиқлаштирувчи кенгаш тузди. Беларусь бош прокурори Александр Конюкнинг таъкидлашича, Мухолифат Мувофиқлаштириш кенгаши фаолияти конституцияга қарши ва ҳокимиятни қўлга олишга қаратилган.
Кенгашнинг ташкил этилиши муносабати билан Жиноят кодексининг 361-моддаси билан жиноят иши қўзғатилиб, унинг доирасида Мувофиқлаштирувчи кенгашнинг бир нечта вакиллари ҳибсга олинган.
Изоҳ (0)