Интернетда «Уддалаб бўлмас топшириқ» кинофраншизасининг еттинчи қисмини суратга олиш ишлари тасвирланган видеоролик пайдо бўлди. Кадрларда Том Круз қаҳрамони Рим кўчалари бўйлаб полициячилардан эшиксиз BMW М5 моделида қочаётганини кўриш мумкин.
BMW компанияси «Уддалаб бўлмас топшириқ» фильми яратувчилари билан 2011 йилдан буён ҳамкорлик қилиб келади. Ўшанда кинофраншизада биринчи бор Бавария моделидан — BMW i8 гибрид суперкари концептидан фойдаланилган. Ҳамкорлик 2018 йилда ҳам давом этган. Унда Итан Хант бошлигидаги жосуслар гуруҳи янги BMW М5 (F90), 1986 йилги BMW 5-Series, шунингдек, BMW 7-Series’да ҳаракатланган.
Ҳозир эса Римнинг тор кўчаларида полициячиларнинг қора BMW М5 ортидан қуваётган саҳнаси суратга олинмоқда. Кадрларнинг сифати пастлиги сабаб автомобилни ким бошқараётганини пайқаш қийин. Бироқ Том Круз автомобиль саҳналаридан дублёрлардан фойдаланмаслиги ҳисобга олинса, седанни бош қаҳрамоннинг ўзи бошқараётган бўлиши мумкин.
Бундан ташқари, кадрларда қора Nissan GT-R ва биринчи авлод Porsche Cayenne’ни ҳам кўриш мумкин. Иккала автомобиль ҳам катта тезликда суратга олиш ишларини амалга оширишга ёрдам берадиган қурилмалар билан жиҳозланган. «Уддалаб бўлмас топшириқ» фильмининг навбатдаги қисми 2021 йилнинг 19 ноябрида катта экранларга чиқади.
Эслатиб ўтамиз, август ойида Том Круз «Уддалаб бўлмас топшириқ-7» фильмининг суратга олиш жараёнида аварияга учраган эди.
Изоҳ (0)