Жиззах вилояти Ғаллаорол туманида Хонимқўрғон қишлоқ фуқаролар йиғини ҳудудидан ўтган Тошкент–Термиз М-39 йўлининг 1034-километрида йўл-транспорт ҳодисаси рўй берди, дея хабар бермоқда ЙҲХББ.
Маълум бўлишича, Сурхондарё вилояти Музработ туманида истиқомат қилувчи 1985 йилда туғилган Б.Қ. Cobalt автомобилини Самарқанд йўналишида бошқариб кетаётиб ухлаб қолган.
Натижада Cobalt олдинда ҳаракатланиб кетаётган Қашқадарё вилояти Қарши шаҳрида яшовчи фуқаро бошқарувидаги «КамAз» юк машинасининг орқа қисмига урилган.
ЙТҲ оқибатида Cobalt автомашинасида бўлган 1982 йилда туғилган фуқаро воқеа жойида вафот этган. Яна бир йўловчи оғир тан жароҳати олиб, Ғаллаорол тиббиёт бирлашмасининг травматология бўлимига ётқизилган.
Ушбу ЙТҲ сабаблари ўрганилганда Cobalt автомашинаси ҳайдовчиси транспорт воситасининг ёритиш чироқлари ишламаган бўлса-да, ҳаракатланишда давом этганлиги ва унда чарчоқ аломатлари борлиги маълум бўлди.
Ҳолат юзасидан Жиноят кодексининг 266-моддаси (одам ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
Аввалроқ Фарғонада автомобиль бошқарувини йўқотиб, дарахтга урилган 16 ёшли ҳайдовчи, Андижонда Damas юк машинасига урилиши оқибатида вояга етмаган йўловчи, Навоийда содир бўлган ЙТҲ оқибатда ҳайдовчи ва пиёда ҳамда Чилонзорда автомобиль бошқарувини йўқотиб, дарахтга урилган 21 ёшли ҳайдовчи вафот этгани хабар қилинганди.
Изоҳ (0)