«Авто идеал хизмати» МЧЖ мансабдор шахслари ўз мижозларининг 8 миллиард сўмдан ортиқ пул маблағларини ўз эҳтиёжлари йўлида сарфлаб юборган. Жабрланувчиларга етказилган зарарни қоплаш мақсадида бошқа мижозларга етказиб берилган 24,6 миллиард сўмлик 219 та автотранспорт воситаларига тақиқлар қўйилган ва хатланган. Бу ҳақда ИИВ ҳузуридаги Тергов департаментига асосланиб «Kun.uz» хабар қилди.
Тергов ҳаракатлари давомида «Авто идеал хизмати» МЧЖ мансабдор шахслари У.Нуриддинов, Қ.Рихсиев ҳамда бошқа шахслар 2019 йил 11 октябрдан 2020 йил 29 февралга қадар автомашина турига қараб мижозлардан 10 миллион сўмдан 80 миллион сўмгача олдиндан тўловларни қабул қилиб, йиллик 5 фоиз тўлов эвазига 1 йилдан 5 йилгача бўлган муддатга автомашина етказиб беришни ваъда қилган. Улар жами 1831 нафар фуқаролар билан умумий қиймати 148,4 миллиард сўмлик транспорт воситасини етказиб бериш ҳақида шартномалар расмийлаштирган. Шартномалар доирасида жами 34,7 миллиард сўм пул маблағларини жамият ҳисоб рақамига қабул қилинган. Олинган пул маблағларидан 24,6 миллиард сўмини транспорт воситалари учун тўлов сифатида ўтказган бўлса, 8,1 миллиард сўм пул маблағларини ўз манфаатлари йўлида сарфлаб юборган.
МЧЖ билан мижозлар ўртасида жами 1831 дона шартнома расмийлаштирилиб, фуқароларнинг ишончига кириш мақсадида 219 нафар фуқароларга транспорт воситаси етказиб берилган. Жамият мансабдор шахслари томонидан пул маблағлари ўзлаштирилиши оқибатида 1612 нафар мижоз олдидаги мажбуриятлар бажарилмаган.
Жиноят иши бўйича жабрланувчиларга етказилган зарарни қоплаш мақсадида бошқа мижозларга етказиб берилган 24,6 миллиард сўмлик 219 та автотранспорт воситаларига тақиқлар қўйилган ва хатланган. Тергов давомида етказилган зарарни қоплаш мақсадида 602 миллион сўм пул маблағлари хатланиб, депозит ҳисоб рақамига сақлаш учун топширилган.
«2020 йил 5 октябрь куни У.Нуриддинов, Қ.Рихсиев ҳамда С.Усмоноваларга нисбатан Жиноят кодексининг 168-моддаси 4-қисми «а,в» бандлари (фирибгарлик) билан айблов эълон қилиниб, дастлабки тергов ҳаракатлари тамомлангани тарафларга эълон қилинган.
Ҳозирда жиноят ишини прокуратура органи орқали тегишли судловга ошириш чоралари кўрилмоқда», дейилади ИИВ ҳузуридаги Тергов департаменти.
Мавзуга доир:
Изоҳ (0)