Internetda “Uddalab bo‘lmas topshiriq” kinofranshizasining yettinchi qismini suratga olish ishlari tasvirlangan videorolik paydo bo‘ldi. Kadrlarda Tom Kruz qahramoni Rim ko‘chalari bo‘ylab politsiyachilardan eshiksiz BMW M5 modelida qochayotganini ko‘rish mumkin.
BMW kompaniyasi “Uddalab bo‘lmas topshiriq” filmi yaratuvchilari bilan 2011-yildan buyon hamkorlik qilib keladi. O‘shanda kinofranshizada birinchi bor Bavariya modelidan — BMW i8 gibrid superkari konseptidan foydalanilgan. Hamkorlik 2018-yilda ham davom etgan. Unda Itan Xant boshligidagi josuslar guruhi yangi BMW M5 (F90), 1986-yilgi BMW 5-Series, shuningdek, BMW 7-Series’da harakatlangan.
Hozir esa Rimning tor ko‘chalarida politsiyachilarning qora BMW M5 ortidan quvayotgan sahnasi suratga olinmoqda. Kadrlarning sifati pastligi sabab avtomobilni kim boshqarayotganini payqash qiyin. Biroq Tom Kruz avtomobil sahnalaridan dublyorlardan foydalanmasligi hisobga olinsa, sedanni bosh qahramonning o‘zi boshqarayotgan bo‘lishi mumkin.
Bundan tashqari, kadrlarda qora Nissan GT-R va birinchi avlod Porsche Cayenne’ni ham ko‘rish mumkin. Ikkala avtomobil ham katta tezlikda suratga olish ishlarini amalga oshirishga yordam beradigan qurilmalar bilan jihozlangan. “Uddalab bo‘lmas topshiriq” filmining navbatdagi qismi 2021-yilning 19-noyabrida katta ekranlarga chiqadi.
Eslatib o‘tamiz, avgust oyida Tom Kruz “Uddalab bo‘lmas topshiriq-7” filmining suratga olish jarayonida avariyaga uchragan edi.
Izoh (0)