Тинчлик бўйича Нобель мукофоти БМТнинг Бутунжаҳон озиқ-овқат дастурига берилди

Нобель қўмитаси Ослода тинчлик бўйича 2020 йилги мукофот соҳибини эълон қилди, деб хабар бермоқда Meduza. Мукофотга Бутунжаҳон озиқ-овқат дастури (World Food Programme) — очарчиликка қарши курашувчи йирик ташкилот муносиб деб топилди.

Дунё бўйлаб очарчиликдан азият чекаётганларга озиқ-овқат етказиб берадиган БМТнинг инсонпарварлик ташкилоти — Бутунжаҳон озиқ-овқат дастури (World Food Programme (WFP) 2020 йилги Нобель тинчлик мукофоти соҳиби деб топилди.

БМТнинг озиқ-овқат етказиб берадиган инсонпарварлик ташкилоти очарчилик билан курашиш борасидаги саъй-ҳаракатлари, можаро зоналарида тинчлик ўрнатиш учун шароит яратишга қўшган ҳиссаси ва очликдан уруш ва можаро қуроли сифатида фойдаланилишининг олдини олишга қаратилган ҳаракатлари учун мукофотланган.

Нобель қўмитаси баёнотида маълум қилинишича, 2019 йилда Бутунжаҳон озиқ-овқат дастури очликдан азият чекаётган 88 мамлакатда қарийб 100 миллион кишига ёрдам берди.

Тинчлик мукофоти — Нобель циклидаги охиргисидан битта олдинги ва Стокгольмда эмас, Ослода эълон қилинадиган ягона соврин. 12 октябрь куни эса иқтисодиёт йўналишида мукофотни ким қўлга киритгани маълум бўлади. Бунга қадар тиббиёт, физика, кимё ва адабиёт бўйича Нобель мукофотининг 2020 йилдаги соҳиблари номи маълум қилинди.

2019 йилда Нобель тинчлик мукофоти Эфиопия бош вазири Абий Аҳмад Алига, қўшни Эритрея билан чегара можаросини ҳал қилиш бўйича қатъий ташаббуси учун берилган.

Нобель қўмитаси қоидаларига кўра, мукофот олишга потенциал номзодлар рўйхати сир сақланади. Аммо қатор ОАВлар йил давомида тинчлик мукофотига баъзи машҳур президент ва сиёсатчилар илгари сурилгани ҳақида хабар берган. Хусусан, Россия президенти Владимир Путин тинчлик бўйича Нобель мукофотига номзод қилиб кўрсатилган, 19 сентябрь куни эса россиялик олим, Нью-Жерсидаги Ратгерс университети профессори Сергей Ерофеев сиёсатчи Алексей Навальний Нобель мукофотига номзод қилиб кўрсатилганини маълум қилганди.