«Қашқадарёда аҳвол бу даражага етганидан хабарим йўқ экан». Алишер Саъдуллаев «Дарё»даги мақолага муносабат билдирди

Ёшлар ишлари агентлигининг Қашқадарё вилоятидаги Чироқчи ва Деҳқонобод тумани бўлимларида агентлик суҳбатидан ўтган мутахассислар иш бошлайди. Бу ҳақда агентлик директори Алишер Саъдуллаев билан суҳбатлашган «Дарё» мухбири хабар берди.

«Дарё» интернет нашрида «Қашқадарёдаги айрим туманларда Ёшлар ишлари бўлимларига агентлик тавсия қилган номзодлар эмас, бошқалар тайинланди. Чунки агентликнинг хати ‘юридик кучга эга эмас’» сарлавҳали мақола эълон қилингач, агентликнинг Қашқадарёдаги масъуллари республика ташкилоти суҳбатидан ўтган раҳбарликка номзодларни «тажрибасиз, режасиз, ёшларнинг муаммоларидан бехабар» деб атади.

Шундан сўнг «Дарё» нашри «Ёшлар ишлари агентлиги масъуллари ўтказган суҳбатлардан ‘тажрибасиз, муаммолардан бехабар, иш режаси йўқ, иш ҳақидан бехабар’ мутахассислар ўтиб кетганига, вилоят ташкилоти расмий ишларни оддий телефон суҳбати орқали (шунда ҳам юқори турувчи ташкилотнинг хатидан салкам бир ой ўтиб) ҳал қилаётганига агентлик ва унинг раҳбари Алишер Саъдуллаев қандай муносабат билдиради? Ташкилотнинг оддий тайинлов ишларида шунча тартибсизлик ва тушунмовчилик, ёшларнинг катта ишлари, катта муаммолари қандай ҳал қилинади?», деган саволни ўртага ташлади.

«Дарё»нинг Қашқадарё вилояти мухбири Отабек Қўлдошев билан телефон орқали мулоқот қилган Алишер Саъдуллаев ҳолатга муносабат билдирди.

«Мен Қашқадарёдаги аҳвол бу даражага етганидан хабарим йўқ экан. Йўл қўйилган хато-камчилик бартараф этилади. Бошқармамиз ходимлари йўл қўйган хато-камчиликларни кўрсатиб берганингиз учун сизга ва «Дарё» жамоасига миннатдорлик билдираман», — деди Алишер Саъдуллаев.

Агентлик директори агар Деҳқонобод ҳамда Чироқчи туманидан номзод қилиб кўрсатилган ва агентлик суҳбатидан ўтган масъулларнинг ўзи истаса агентлик уларга ишонч билдиришини маълум қилди.

«Деҳқонобод туманидан номзод сифатида кўрсатилган Адҳам Қулмаматов ҳамда Чироқчидан номзод қилиб кўрсатилган Алишер Бекназаровларнинг ўзи ишлашни хоҳласа, биз уларга имконият берамиз ва улар билан ишлаймиз», — деди Алишер Саъдуллаев.

Алишер Саъдуллаев бу ҳақда агентликнинг расмий Telegram каналида муносабат ҳам билдирилишини маълум қилди.