Олий Мажлис Сенати раиси Танзила Норбоева 6 октябрь куни Тошкент вилояти ҳокимлигида бўлиб ўтган Сенат кенгашининг сайёр мажлиси Қумқўрғонда 6,5 миллиард сўмга қурилган, бироқ орадан кўп ўтмай қулаб тушган кўприк масаласига тўхталган. У мазкур ҳодисани бюджет маблағлари, халқ ризқини талон-торож қилиш деб атаган. Бу ҳақда «Kun.uz» хабар қилмоқда.
«Мамлакатимизда қурилиш соҳасини коррупциядан холи соҳага айлантириш бўйича республика комиссиясининг қарори бор. Тизимда-очиқлик, шаффофликни таъминлаш бўйича жиддий чоралар кўрила бошланди – мана энди қадам қўйяпмиз. Бу камчилик-хатолар энди кечирилмайди.
Бу каби муаммолар қурилиш сифатини тушиб кетишига ҳам олиб келмоқда. Мана яқинда ижтимоий тармоқлар орқали Сурхондарё вилояти Қумқўрғон тумани "Кўганли" маҳалласида 2017 йилда 6.5 миллиард сўмга қурилган кўприк, 2 йил ўтмасдан вайрон бўлганини ҳаммамиз билдик.
Шунингдек, аҳоли ўша ҳудуддаги йўл қурилиши сифатидан ҳам норози. Бу лойиҳага ҳам 5,5 миллиард сўм маблағ ажратилган экан. Бундай ҳолатларни яна кўплаб ҳудудларда кузатиш мумкин», – дейди Норбоева.
Мавзуга доир: «6,5 млрд сўмга қурилган кўприк қулади. Энди йўлимиз ҳам шундай яроқсиз бўлмасин» — қумқўрғонликлар
«Нима сабабдан қурилиш соҳасида кўплаб қонунбузилиш ҳолатлари содир бўлса ҳам уларнинг сабаблари, уларга яратилаётган «шароитлар» чуқур ўрганилмаяпти. Қачонгача бюджет маблағлари, халқ ризқи талон-торож қилинади?!
Фақат қуриб-қуриб кетавериш эмас, уни текшириш ҳам, назорат қилиш ҳам керак. Одамларда эътироз, саволлар кўп. Лекин тегишли идоралар томонидан муносабат билдирилиши мутлақо қониқарсиз аҳволда. Агар айбдор бўлса, «айбдормиз, шуни яхши ишламаган эдик, тегишли чора кўрамиз» деган гапни айтиш ҳам мардлик. Қачон одамлар билан гаплашишни ўрганамиз. Фақатгина вазирлик ҳокимлик билан, ҳокимлик вазирлик билан гаплашиш билан иш битади. Биз одамлар учун ишлаяпмиз-ку, одамларнинг саволларига жавоб бериш учун ишлаяпмиз», – дея таъкидлаган Сенат раиси.
Мажлисда масофадан туриб қатнашган қурилиш вазири ўринбосари Козим Тўлаганов Қумқўрғондаги кўприк сифатига вазирлик жавоб беролмаслигини, чунки у автойўл тизимидаги инспекция рўйхатидан ўтганини маълум қилди.
«Чиндан ҳам Тошкент вилояти бўйича қурилиш соҳасида жуда кўп қолоқликларга йўл қўйилган. Масалан, бу йилги қурилиш дастурига 180 та объект киритилган бўлса, бугунги кун ҳолатига бор йўғи 11 та объект қабул қилинган. Июнь ойи билан бугунни таққослайдиган бўлсак, мингга яқин объектга назорат чора-тадбири кўрилди.
Бу йил қурилиш соҳасида назорат бўйича ҳукуматнинг 3 та қарори чиқди. Тошкент вилоятида қурилиш тизими шу йилнинг охиригача шаффофлик тизимига тўлиқ ўтказилади. 1 январдан бошлаб қурилиш соҳасидаги назорат очиқ тизимга ўтказилади.
Қумқўрғондаги кўприк автойўл тизимидаги инспекция рўйхатидан ўтган экан, биздан ўтган эмас. Лекин, албатта, биз ҳам бу иш бўйича эътироз билдирамиз», – деб айтган вазир ўринбосари.
Эслатиб ўтамиз, Сурхондарё вилоятининг Қумқўрғон туманида 6,5 миллиард сўмга қурилган кўприк 1 йил-у 7 ой хизмат кўрсатгач яроқсиз ҳолга келганди. Бу ҳолат бўйича Бош Прокуратура ўрганиш олиб боришини билдирган ва қурилишда қўшиб ёзиш ҳолатлари аниқланмаганини маълум қилган.
Бироқ вилоят прокуратурасининг изоҳ беришича, пудратчи ва буюртмачи ўртасида имзоланган 2014 йил 21 апрелдаги шартномада кўприк қурилишини зиммасига олган пудратчининг мажбуриятлари кўрсатиб ўтилган бўлса-да, пудратчи мажбуриятларини тўлиқ бажармаган. Бу вилоят прокуратурасига маълум бўлган. Лекин коронавирус пандемияси сабаб прокуратура тергов-суриштирув жараёнларини олиб боролмаган.
Кейинроқ маълум бўлишича, 6,5 миллиард сўмга қурилган кўприк 9,6 миллиард сўмга таъмирланадиган бўлди.
Изоҳ (0)