Пайариқ ҳокими туман «қониқарсиз» деб топилишида асосий айбдор ўзи эканлигини тан олди

Самарқанд вилоятининг Пайариқ тумани ҳокими Дилшод Мусинов туман республикадаги 33 та «қониқарсиз» ҳудуд сафидан жой олгани учун энг биринчи навбатда ўзи айбдор эканлигини айтиб, туман аҳолисидан узр сўради. Бу ҳақда Халқ депутатлари Пайариқ туман кенгашининг навбатдан ташқари сессиясида маълум қилинди, дея хабар берди «Дарё» мухбири.

Сессияда туманда аҳоли жон бошига саноат маҳсулотлари ишлаб чиқариш ҳажми 688,0 минг сўмни ташкил этиши, туман вилоятда бу масалада 13-ўринни эгаллаши айтилган. Шунингдек, жон бошига тўғри келадиган хизматлар ҳажми 1140,1 минг сўмни ташкил этган.

«Туманда аҳволи оғир сектор менинг секторим ҳисобланади. Туман ‘қониқарсиз’ ҳудудга кириб қолишида энг биринчи навбатда ўзимнинг секторимдаги муаммолар сабаб бўлган деб биламан. Бунинг учун мен узр сўрайман», — деган туман ҳокими Дилшод Мусинов.

Маълум қилинишича, туманда аҳоли жон бошига тўғри келадиган чакана савдо ҳажми 1929,8 минг сўмни ташкил этиб, вилоятда 15-ўринни эгаллаган.

Шунингдек, туманда меҳнат бозорининг самарадорлик кўрсаткичлари бўйича аҳоли бандлиги 94 минг кишини, бандлик даражаси 90,8 фоизни ташкил этиб, вилоятда 4-ўринда бормоқда. Бу борада янги иш ўринларини яратиш ва аҳоли бандлик даражасини 30 фоизга ошириш белгиланган. Хусусан, туманнинг Ингичка қишлоғида 1600 гектар лалми майдонда интенсив узумзор барпо этиш орқали 3200 та иш ўрни яратиш борасида ишлар олиб борилмоқда. Туман аҳолиси орасида ташаббускорларни аниқлаб, 50 сотихдан кредит асосида тайёр боғ ажратилиши таъминланади. 3200 нафар ёшларнинг бандлиги таъминланиб, бозорларда озиқ-овқат маҳсулотлари кўпайишига имкон яратилади.

Туман ҳокимининг маълум қилишича, хотин-қизларнинг иш билан бандлик даражаси 85,8 фоизни кўрсатиб, туман вилоятда 6-ўринда бормоқда. Қолаверса, 1236 нафар ишсиз хотин-қизнинг бандлигини таъминлаш чоралари ишлаб чиқилиб, 98 нафарини ижтимоий-иқтисодий ривожлантириш дастурларида ишга тушаётган корхоналарда яратилаётган иш ўринларига жойлаштирилиши белгиланган.

Пайариқ туманининг экспортга йўналтирилган саноат маҳсулотлари ҳажми 7,1 млрд. сўмни ташкил этиб, вилоятда 13-ўринни эгаллаган. Туманда фаолият юритаётган «Samarqand cotton cluster» МЧЖ томонидан йил якунига қадар 2,0 млн доллар саноат маҳсулотлари экспортини амалга ошириш ишлари олиб борилмоқда.