Ўзбекистонда табиий газ етиб бормаган ҳудудларни газ билан таъминлаш учун суюлтирилган газ баллонлари етказиб берилади. Суюлтирилган газни етказиб беришда вақт чўзилиши ҳолатлари кузатилмоқда. Мана шу ҳолатлар юзасидан «Ҳудудгазтаъминот» АЖ бошқаруви раисининг биринчи ўринбосари в.б. Баҳодир Ваҳобов 8 октябрь куни АОКАда бўлиб ўтган матбуот анжуманида маълумот берди.
«Албатта, ҳар нарсанинг вақти ўтганидан сўнг таъмирлаш ишлари бўлади. Бизда айрим ҳудудларда узилишлар бўлди. Суюлтирилган газ ишлаб чиқарилган заводлар ҳар ойда профилактика ишларини олиб боради. Яъни янги технологияларни жойлаштириш, линияларни очиш каби ҳолатларда узилишлар бўлиб ўтди. Ҳозирги кунда бундай узилишларни бартараф қилганмиз. Суюлтирилган газни аҳоли хонадонларига тез ва сифатли етказилиши учун пластик карта, яъни ID карталарни қўллаяпмиз. Бунда газнинг истеъмолчига етиб боргунича бўлган вазият назоратда туради. Суюлтирилган газни етказиб берувчи техник машиналар қачон қайси кўчани газ билан таъминлаб келаётганлигини ҳамма-ҳаммасини онлайн равишда кўриб турамиз», – деди Баҳодир Ваҳобов.
Маълумот учун, табиий газ етиб бормаган жойларда суюлтирилган газ баллонларини етказиб бериш муддати бир ойни ташкил қилади. Агарда ишлаб чиқарувчи заводда қандайдир камчиликлар бўладиган бўлса, бу муддат чўзилиши мумкин.
Изоҳ (0)