“Lukoyl” kompaniyasi koronavirus sabab Xitoyda gazga bo‘lgan talab kamayib ketgani bois O‘zbekistonda gaz qazib olishni loyiha quvvatidan 40 foizga qisqartirdi. Bu haqda kompaniyaning birinchi chorak bo‘yicha e’lon qilgan hisobotida keltirilgan.
“Bu birinchi chorakda, shuningdek, aprel va may oylarida uglevodorodlar qazib olinishining umumiy hajmiga ta’sir ko‘rsatdi”, — deyiladi kompaniya faoliyatiga oid tahlil natijalarida.
“Lukoyl” 2020-yilning birinchi choragida O‘zbekistondagi obyektlari orqali 2,839 milliard kub metr gaz qazib olgan, o‘tgan yilning shu davrida ushbu ko‘rsatkich 3,824 milliard kub metrni tashkil etgan. Shu orqali qisqarish 25,8 foizni tashkil etmoqda, 2019-yilning to‘rtinchi choragi bilan qiyoslaganda esa (3,875 milliard kub metr) qisqarish — 26,7 foizga teng.
O‘zbekistonda gaz qazib olishning qisqarishi oqibatida yuzaga kelgan salbiy ta’sirlar chet el bilan mahsulotlar almashish kelishuvi doirasidagi qazib olish loyihalaridagi ulushni oshirish hisobiga qisman qoplangan.
Avvalroq O‘zbekiston “Lukoyl”dan 2018-yilda yetkazib berilgan gaz uchun 600 million dollarga yaqin qarz bo‘lib qolgani haqida xabar berilgan edi.