Қимматбаҳо сумкалар доимо ҳам юқори сифатга кафолат бера олмайди. Маҳсулотнинг сифатсизлигидан дарак берувчи белгилар билан яқиндан танишиб чиқиш фойдадан холи эмас.
Аниқ бўлмаган шакл
Сифатсиз сумка кўпинча қопга ўхшайди. Шунинг учун у дастлаб аниқ шаклга эга бўлиши керак, сумками ёки халта, аниқлаб олиш зарур. Сифатсиз сумкаларда биринчи шаклни тилга олиш бежизга эмас, ноаниқ шаклдаги сумка ўша хотира билан инсонлар ёдида қолади. Шунингдек, умуман тасвир ҳақидаги таассуротни бузади.
Нотeкис чоклар
Нотекис чок – харид чоғида яна бир ёдга тушиши керак бўлган белгидир. Ушбу нуқсон, албатта, сумканинг умрини сезиларли даражада қисқартиради.
Ортиқча иплар
Сифатли сумкаларнинг астари, чоки, ички қисмларида ҳеч қандай ортиқча ип чиқиб турмайди. Гарчи сумка қанчалар чиройли ва бежирим бўлмасин, ундан осилиб турган ип толаларини кесиб ташлаш кейинчалик бошқа чокларга зарар бериши мумкин. Шунингдек, сумка сифатига ҳам таъсир қилади.
Сифатсиз безаклар
Орзудаги сумка харидидан сўнг куни бўйи ундан фойдаланиш натижасида камчиликлар кўрина бошлайди. Масалан, сумка устига ёпиштирилган ёки тикилган безакларнинг тушиб кетиши ёки ранги ўзгариши мумкин. Сумка қанчалар янги бўлмасин, унинг кўринишини бузиб туради.
Ёқимсиз ҳид
Сумка чарм ёки чарм ўрнини босувчи материалданми – фарқи йўқ. Сабаби сифатли сумкалар ўзидан ҳеч қандай ҳид чиқармайди. Харид чоғида ҳам бироз нохуш ҳид сезилса, дарҳол танловни ўзгартирган маъқул. Чунки ҳид кейинчалик ҳам безовта қилади. Шунингдек, ёқимсиз ҳиднинг асосий сабаби материалга кимёвий модда аралашганидир. Айнан бу орқали баъзи аллергик касалликлар қўзғалиши ҳам мумкин.
Ёмон астар
Албатта, сумка астарини фақатгина унинг эгаси кўриши мумкин. Лекин айнан астарда ҳам бир қанча муаммолар келиб чиқади. Масалан, астарнинг сифатсизлиги натижасида тез йиртилади ва сумкага солинган буюмлар астар тешигига тушиб қолиши мумкин. Шунингдек, астар билан боғлиқ яна бир қанча ёқимсиз ҳолатлар пайдо бўлади.
Ортиқча деталлар
Кўпинча турли мунчоқ ва тошлар билан безатилган сумкалар аслида унинг кўримсиз ва сифатсизлигини яшириш мақсадида қўлланилади. Айрим харидорлар ана шундай қўшимча деталлар эвазига алданиб қолади. Ҳар қандай сумканинг ўзи деталларсиз чиройли кўринишга эга бўлиши зарур.
Изоҳ (0)