Самарқанд вилоятида Tacuma русумли автомобиль бетон тўсиққа урилиши оқибатида 3 киши ҳалок бўлди, дея хабар бермоқда Тергов департаменти.
Маълум қилинишича, 2020 йилнинг 4 октябрь куни соат 20:30 да Самарқанд вилояти Нарпай тумани «Оқолтин» МФЙ ҳудудидан ўтувчи Тошкент–Нукус М-37 автомобиль йўлининг 96-километрида Қорақалпоғистоннинг Амударё туманида яшаган 42 ёшли ҳайдовчи З.Б. бошқарувида бўлган Tacuma русумли автомашина йўналиши бўйича ҳаракатланаётганида руль бошқарувини йўқотган.
Натижада автомобиль йўлни ажратиб турувчи ўртадаги бетон тўсиққа урилиб, йўл-транспорт ҳодисаси содир қилган.
Оқибатда ҳайдовчи З.Б. ва йўловчи, 26 ёшли Н.А. воқеа жойида, бошқа бир йўловчи 37 ёшли М.С. эса олган тан жароҳатлари оқибатида туман тиббиёт бирлашмасида кўрсатилган тиббий муолажаларга қарамасдан вафот этган.
Шунингдек, машинада бўлган яна икки нафар йўловчи — 41 ёшли Х.Қ. ва унинг укаси Ж.Қ. турли тан жароҳатлари олиб, туман тиббиёт бирлашмасига ётқизилган.
Мазкур ҳолат юзасидан Нарпай туман ИИБ ҳузуридаги Тергов бўлими томонидан Жиноят кодексининг 266-моддаси 3-қисми «а» банди (транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига сабаб бўлса) билан жиноят иши қўзғатилган.
Жиноят иши шу куннинг ўзида вилоят ИИБ ҳузуридаги Тергов бошқармаси иш юритувига олинган. Ҳозирда тергов ҳаракатлари олиб борилмоқда.
Мавзуга доир:
Изоҳ (0)