Ички ишлар вазирлиги Йўл ҳаракати хавфсизлиги бош бошқармаси Сурхондарё вилоятида Nexia ҳамда автобус иштирокида икки инсоннинг ўлимига сабаб бўлган йўл транспорт ҳодисаси содир бўлганини хабар қилди.
Хабарга кўра, 2020 йилнинг 3 октябрь куни соат 11:10 ларда, Сурхондарё вилояти, Жарқўрғон тумани, «Оқтепа» маҳалласи ҳудудидан ўтувчи М-41 автомобиль йўлининг 1603-километрида йўл транспорт ҳодисаси юз берган. Nexia’ни тегишли ҳужжатларсиз бошқарган 1999 йилда туғилган С.С. исмли ҳайдовчи тезликни меъёридан ошириб, қувиб ўтиш қоидаларига амал қилмасдан қаршисидан келаётган 1963 йилда туғилган Р.Ш. бошқарувидаги автобус билан тўқнашган. Оқибатда автобус йўл четига ёнбошлаб қолган.
ЙТҲ оқибатида 21 ёшли С.С. ва ушбу автомобиль ичидаги йўловчи 1999 йилда туғилган О.Р. оғир тан жароҳатлари олиб воқеа жойида вафот этган.
Мазкур ЙТҲ юзасидан Жарқўрғон тумани ИИБ ҳузуридаги Тергов бўлими томонидан терговга қадар дастлабки суриштирув ишлари олиб борилмоқда, дейилади ЙҲХББ хабарида.
Аввал Сурхондарё вилояти Денов туманида Nexia русумли автомобилни бошқариб кетаётган 20 ёшли ҳайдовчи тезликни ошириши оқибатида машина ичидаги 20 ёшли йўловчи С.С. оғир тан жароҳатлари олиб, шифохонада вафот этгани, Жарқўрғон тумани «Ғур-Ғур» маҳалласи ҳудудида содир бўлган мудҳиш йўл-транспорт ҳодисаси оқибатида олти киши ҳалок бўлгани, Қизириқ туманида Malibu ҳамда «Жигули» иштирокида даҳшатли йўл транспорт ҳодисаси юз бергани, оқибатда икки киши ҳаётдан кўз юмгани ҳақида хабарлар берилган.
Изоҳ (0)