Тошкент шаҳридаги ТҲАЙ кўчаси («бетонка»)да Lacetti ҳамда Nexia иштирокида йўл-транспорт ҳодисаси содир бўлди. Бу ҳақда Ички ишлар вазирлиги Йўл ҳаракати хавфсизлиги бош бошқармаси хабар қилган.
Хабарга кўра, 4 октябрь куни соат 17:00 ларда Тошкент шаҳар, Юнусобод тумани, ТҲАЙ кўчасида жойлашган «Туркистон» тўйхонаси яқинида ЙТҲ содир бўлган.
Дастлабки маълумотлар бўйича, 1994 йилда туғилган А.А. бошқарувидаги Lacetti 2000 йилда туғилган С.Ғ. бошқарувидаги Nexia билан тўқнашган. Оқибатда Nexia’да ёнғин юзага келган.
«Ёнғин чиққан автомобиль ичидаги йўловчилардан бири тан жароҳати олиб, шифохонага мурожаат қилган. Юзага келган ёнғин ўт ўчирувчилар томонидан бартараф этилган.
Ҳолат юзасидан Тошкент шаҳар ИИББ ЙҲХБ масъул ходимлари томонидан суриштирув ишлари олиб борилиб, тўқнашув сабабларига аниқлик киритилмоқда», – дейилади бошқарма ахборотида.
Аввал Юнусободда Lacetti катта тезликда дарахтга урилиши оқибатида ёниб кетгани, ҳайдовчи жароҳат олиб шифохонага тушгани, Чилонзорда Mazda ёниб кетгани, шунингдек, Юнусободда Spark ва Matiz ўртасида содир бўлган тўқнашув оқибатида автомобиллардан бирида ёнғин содир бўлгани ҳақида хабарлар берилган эди.
Изоҳ (0)