Бухоро вилояти Шофиркон туманининг «Алишер Навоий» маҳалла фуқаролар йиғинида яшовчи Муқимовлар оиласида уч эгизак фарзанд туғилди. Бу ҳақда Шофиркон тумани ҳокимлиги матбуот хизмати маълум қилди.
Шофиркон ҳокимлиги матбуот хизмати раҳбари Завқиддин Зойировнинг «Дарё»га маълум қилишича, бундан бир ярим йил илгари оила қурган Оғабек Муқимов ҳамда Мунаввар Зариповалар ота-она бўлиш бахтига эришди. Эгизаклар оиланинг дастлабки фарзандлари бўлди.
Маълум қилинишича, эгизаклар — икки ўғил ва бир қиз 2020 йилнинг 5 сентябрида дунёга келган.
«Вилоят перинатал марказининг акушер-гинекологлари муддатидан аввал туғилган уч эгизакнинг саломатлигини тиклаш, уларни оиласи бағрига қайтаришда амалий саъй-ҳаракатлар олиб борди», — дейилади туман ҳокимлиги хабарида.
Эгизакларнинг тўнғичи — Мирзиё 1 килограмм 100 грамм, ўртанчаси — Миромон 1 килограмм 15 грамм, кенжаси — Саида 1 килограмм 300 грамм вазн билан туғилган. «Бизни қувонтиргани, уч эгизни дунёга келтирган Мунавварда туғруқ жараёни оғир кечмади. Болалари соғлом ва ҳар бирининг оғирлик вазни ҳам яшаб кетиши учун етарли даражада», — деди вилоят перинатал маркази тажрибали шифокори Насиба Баҳромова. Ҳозирда уларнинг вазни ортиб, аҳволи кундан кунга яхшиланмоқда. Аёлнинг ҳам саломатлиги меъёрий ҳолатда.
Оила катталарининг билдиришича, уч эгизак — Фатуллаев(а)лар тез кунларда соғ-саломат оиласи бағрига қайтади.
Эслатиб ўтамиз, 2019 йилнинг 25 март куни Бухоро вилояти Шофиркон туманида яшовчи Шерзод Ўринов ва Маҳлиё Азимованинг оиласида 25 март куни уч эгизак туғилганди. Уларга Президент Шавкат Мирзиёев шарафига Шавкат, Миромон ва Мирзиё исмлари берилганди. Кейинроқ эгизакларнинг отасига Президент номидан Cobalt совға қилинганди.
Шунингдек, 2019 йилнинг октябрь ойида Бухоро шаҳрида яшовчи Мирали Рамазонов ҳамда Ҳафиза Давронованинг оиласида уч эгизак туғилганди. Чақалоқларга Шавкат, Мирзиё ва Саида исмлари қўйилганди.
Изоҳ (0)