Англия Премьер Лигаси клублари пандемия даврида мухлисларни стадионларга қайтариш учун велосипедлардан фойдаланиши мумкин, дея хабар беради The Sun.
Манбага кўра, ўтган дам олиш кунлари стадионларга чекланган миқдордаги мухлислар кириши керак эди, аммо коронавирус инфекциясининг авж олгани сабабли Буюк Британия ҳукумати ушбу қарорни бекор қилди. Қайд этилишича, ҳукумат минглаб мухлислар стадионларга етиб бориш учун жамоат транспортидан фойдаланади деган фикрда. Бу эса ўз навбатида касалликнинг янги ҳолатларини келтириб чиқариши мумкин.
Премьер Лиганинг етакчи клублари эса стадионларга одамларнинг гавжум бўлмаган ҳолда етиб келиши мумкинлигини кўрсатмоқчи. Бунинг учун жамоалар мухлисларга велосипедларни ижарага бермоқчи, ушбу ҳолатда мухлисларнинг хавфсизлиги таъминланади. Шунингдек, қўшимча автомобиллар учун тўхташ жойини таъминлаш ва темир йўл компаниялари билан ижтимоий масофани сақлаш мақсадида етарли хизматлар кўрсатиш учун ҳамкорликни йўлга қўйиш имкониятлари ҳам кўриб чиқилмоқда.
Қайд этиш жоиз, ҳозиргача Англия чемпионатининг 3-тури ортда қолди, «Лестер», «Эвертон» ва «Ливерпуль» клублари 3 та ўйиндан максимал очко тўплаб, турнир жадвалида карвонбошилик қилмоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)