Элдор Шомуродов «Женоа»га ўтмаслиги мумкин. Унга А Сериянинг яна икки клуби харидор

«Женоа» спорт директори Даниэле Фажиано «Ростов» ҳужумчиси Элдор Шомуродов трансфери амалга ошишини тасдиқлаган бўлса-да, келишув сўнгги паллада тўхташи мумкин.

Metaratings маълумотларига кўра, Ўзбекистон миллий терма жамоаси футболчисига «Женоа»дан ташқари, А Сериянинг яна икки клуби — «Верона» ва «Фиорентина» қизиқиш билдирган. Улар Элдор учун 10 миллион еврогача бўлган маблағни тўлашга тайёр.

«Фиорентина» Шомуродов учун белгиланган миқдорни тўлиқ тўламоқчи, «Верона» ва «Женоа» эса бўлиб тўлашни имкониятидан фойдаланмоқчи. Шуни ҳисобга олиб, Элдорнинг «Женоа»га ўтмаслик эҳтимоли мавжуд.

Қайд этиш жоиз, «Ростов» ҳали «Верона» ва «Фиорентина»дан расмий таклиф олмаган, Дон клуби италияликлардан расмий хатни 1 октябрь, пайшанба кунининг охирига қадар кутишини маълум қилган.

Аввалроқ генуяликлар клуби Шомуродов учун 7,5 миллион евро таклиф қилаётгани, шунингдек, Элдорнинг ўзи йилига 600–700 минг евро маош олиши ва А Серия жамоаси ўзбекистонлик футболчи билан камида 3 йиллик шартнома имзолаши кутилаётгани ҳақида хабар берилганди.

Маълумот учун, Элдор ростовликлар сафида 2017 йилдан бери тўп тепиб келади. Мазкур вақт мобайнида у 91 ўйинда майдонга тушиб, 18 та гол урди ва 12 та голли узатма амалга оширди. Унинг «Ростов» билан амалдаги шартномаси 2024 йилгача мўлжалланган.

25 ёшли футболчи «Машъал» академияси тарбияланувчиси ҳисобланиб, «Ростов»дан аввал «Бунёдкор» сафида ҳаракат қилган.