Таиланддаги меҳмонхона ҳақида салбий изоҳ ёзган америкалик сайёҳ икки йиллик қамоқ жазосига ҳукм қилиниши мумкин. Бу ҳақда «Интерфакс» хабар берди.
Фото: «Korrespondent.net»
Маълум қилинишича, Ко Чанг оролида жойлашган Sea View Resort курорти америкалик Уэсли Барнс устидан судга шикоят қилган. Бу сайёҳ 2020 йилнинг июль ойида TripAdvisor ва Google’да ўзининг Таиланддаги саёҳати ҳақида салбий изоҳлар ёзган.
Сайёҳнинг TripAdvisor хизматида қолдирган изоҳи 167 мингдан ортиқ обуначиси бўлган таниқли блогер Ричард Барроу томонидан Twitter’да эълон қилингач, воқеалар ривожланиб кетган.
Ўз изоҳида Барнс меҳмонхона ходимларини унга «дўстона муносабатда бўлмаганликда» айблаган ва «курортдагилар ўзларини худди меҳмонларга қизиқмагандек тутишини» таъкидлаган.
Сайёҳ қолдирган изоҳга меҳмонхона ҳам жавоб берган ва сайёҳни ўзи билан спиртли ичимлик олиб келгани учун тартибларни бузганликда айблаган. Меҳмонхона томонидан қайд этилишича, улар меҳмонга бўш келиб, олиб келинган спиртли ичимлик учун бадал тўламаслигига рухсат берган.
Маҳаллий қонунчиликдаги ўзига хосликлар туфайли курорт меҳмоннинг устидан судга шикоят қилишга муваффақ бўлган. Мазкур ўзига хослик туҳмат ва унга гумон қилинган шароитда фуқаролик ва жиноий иш очишга имкон беради.
Бу қонун баҳсли масалаларга жамоатчилик эътиборини қаратадиган журналистлар, танқидчилар ва бошқа шахсларни қўрқитиш учун тез-тез қўлланилади. Унга асосан энг оғир жазо икки йилгача қамоқ ва тахминан 6300 доллар жарима ҳисобланади.
Айни пайтда Уэсли Барнс қамоқда икки кечани ўтказган ва гаров эвазига озод қилинган.
