Жаҳон соғлиқни сақлаш ташкилоти бош котиби Тедрос Гебрейесуснинг 28 сентябрдаги брифингида айтишича, келаси олти ой ичида кам ва ўрта даромадли мамлакатлар COVID-19 учун 120 миллион дона арзон, сифатли ва тезкор тестларни қабул қилиб олади. Бу ҳақда ташкилот ахборот хизмати маълум қилди.
«Биз COVID-19’ни қанчалик тез аниқласак, шунчалик тезроқ хавфли вирусни юқтирган одамларни ажратиш ва даволаш чораларини кўрамиз», – деди ЖССТ раҳбари.
Тедрос Гебрейесуснинг сўзларига кўра, янги тестлар ишончли натижани аввалгидек соатлаб ёки кунлаб эмас, балки тахминан 15-30 дақиқада олиш имконини беради. Шу билан бирга, янги тестлар арзон ва у мураккаб техник жиҳозларни талаб қилмайди.
«Бу тиббий лабораториялар ва мутахассислар мавжуд бўлмаган, ёки бундай жойга бориш қийин бўлган ҳудудларда синовларни кўпайтиришга имкон беради», – деди Гебрейесус.
Энди битта тезкор тест нархи тахминан беш долларни ташкил этади, бу аввалги авлод синовларидан анча арзон. Келажакда ЖССТ нархларнинг янада пасайишини кутмоқда
ЖССТ раҳбарининг айтишича, тез кунларда тезкор тестларни етказиб бериш тўғрисида битим икки ишлаб чиқариш компанияси ва Билл ҳамда Мелинда Гейтс фонди томонидан имзоланган.
«Расмий равишда тасдиқланган шартномаларни имзоладик, лойиҳани амалга ошириш учун маблағ олдик ва энди ушбу тестларни тўлиқ сотиб олиш учун зарур бўлган маблағни йиғишимиз керак», – деди ташкилот раҳбари.
Аввалроқ ЖССТ коронавирус билан боғлиқ ўлим ҳолатлари расмий маълумотларда қайд этилганидан кўпроқ эканини маълум қилганди
Изоҳ (0)