Ўзбекистон Хитой билан камбағалликни қисқартириш соҳасида ҳамкорлик қилмоқчи. Бу ҳақда 26 сентябрь куни «Камбағалликни қисқартириш юзасидан ҳамкорликни кенгайтириш» халқаро видеоконференциясида маълум бўлди.

Фото: Иқтисодий тараққиёт ва камбағалликни қисқартириш вазирлиги

Конференция иштирокчилари орасида Хитой ташқи ишлар вазири Ван И, БМТ бош котибининг биринчи ўринбосари Амина Муҳаммад, БМТ бош котибининг ўринбосари Лью Ченминг, Миср, Қозоғистон, Перу, Филиппин, Жанубий Африка ва бошқа ривожланаётган мамлакатларнинг ташқи ишлар вазирлари бор.

Иқтисодий тараққиёт ва камбағалликни қисқартириш вазирлиги матбуот хизматининг хабар беришича, Ўзбекистон делегацияси камбағалликка қарши курашиш соҳасида глобал ҳамкорликни кучайтириш зарурлигини таъкидлаб, шунингдек, мамлакатнинг камбағалликка қарши курашиш бўйича муваффақиятли тажрибасини ҳисобга олган ҳолда, Хитойнинг ролини алоҳида таъкидлаб ўтди.

Хитой ташқи ишлар вазири ва БМТ вакиллари глобал пандемия дунёдаги 70-100 миллионга яқин одамни ўта камбағалликка тушириши билан таҳдид қилишини таъкидлади. Шу муносабат билан, пандемия шароитида янада муҳим омилга айланган камбағалликни камайтириш, молиявий ва техник ёрдам ролини кучайтириш соҳасидаги стратегик шерикликнинг аҳамияти қайд этилди.

Фото: Иқтисодий тараққиёт ва камбағалликни қисқартириш вазирлиги

Ўзбекистон томони Хитой билан камбағалликни камайтириш соҳасидаги ҳамкорликнинг ҳуқуқий асосларини яратишни, вазирлик ва идоралар ходимлари учун Хитойга камбағалликни камайтириш тажрибасини ўрганиш учун хизмат сафарини ташкил қилишни, шунингдек, Хитой томонидан Иқтисодий ривожланиш ва камбағалликни камайтириш вазирлигига маслаҳатчи жалб қилишни таклиф қилди.

Аввалроқ Бош вазир ўринбосари, иқтисодий ривожланиш ва камбағалликни камайтириш вазири одамларга пул бериш орқали қкамбағалликни камайтириш мумкин эмаслигини айтган эди. Унга кўра, камбағалликни камайтиришга таъсир этувчи омиллар иқтисодиётни ривожлантириш, тадбиркорлик, таълим ва соғлиқни сақлашдир.

Унинг таъкидлашича, Ўзбекистон ҳукуматининг сиёсати аҳолини камбағалликдан халос этишга, шунингдек, одамларни камбағалликка тушиб қолишининг олдини олиш учун ижтимоий ҳимоя чораларидан фойдаланишга қаратилган.