O‘zbekiston kambag‘allikni qisqartirish bo‘yicha Xitoy tajribasini o‘rganadi

O‘zbekiston Xitoy bilan kambag‘allikni qisqartirish sohasida hamkorlik qilmoqchi. Bu haqda 26-sentabr kuni “Kambag‘allikni qisqartirish yuzasidan hamkorlikni kengaytirish” xalqaro videokonferensiyasida ma’lum bo‘ldi.

Konferensiya ishtirokchilari orasida Xitoy tashqi ishlar vaziri Van I, BMT bosh kotibining birinchi o‘rinbosari Amina Muhammad, BMT bosh kotibining o‘rinbosari Lyu Chenming, Misr, Qozog‘iston, Peru, Filippin, Janubiy Afrika va boshqa rivojlanayotgan mamlakatlarning tashqi ishlar vazirlari bor.

Iqtisodiy taraqqiyot va kambag‘allikni qisqartirish vazirligi matbuot xizmatining xabar berishicha, O‘zbekiston delegatsiyasi kambag‘allikka qarshi kurashish sohasida global hamkorlikni kuchaytirish zarurligini ta’kidlab, shuningdek, mamlakatning kambag‘allikka qarshi kurashish bo‘yicha muvaffaqiyatli tajribasini hisobga olgan holda, Xitoyning rolini alohida ta’kidlab o‘tdi.

Xitoy tashqi ishlar vaziri va BMT vakillari global pandemiya dunyodagi 70-100 millionga yaqin odamni o‘ta kambag‘allikka tushirishi bilan tahdid qilishini ta’kidladi. Shu munosabat bilan, pandemiya sharoitida yanada muhim omilga aylangan kambag‘allikni kamaytirish, moliyaviy va texnik yordam rolini kuchaytirish sohasidagi strategik sheriklikning ahamiyati qayd etildi.

O‘zbekiston tomoni Xitoy bilan kambag‘allikni kamaytirish sohasidagi hamkorlikning huquqiy asoslarini yaratishni, vazirlik va idoralar xodimlari uchun Xitoyga kambag‘allikni kamaytirish tajribasini o‘rganish uchun xizmat safarini tashkil qilishni, shuningdek, Xitoy tomonidan Iqtisodiy rivojlanish va kambag‘allikni kamaytirish vazirligiga maslahatchi jalb qilishni taklif qildi.

Avvalroq Bosh vazir o‘rinbosari, iqtisodiy rivojlanish va kambag‘allikni kamaytirish vaziri odamlarga pul berish orqali qkambag‘allikni kamaytirish mumkin emasligini aytgan edi. Unga ko‘ra, kambag‘allikni kamaytirishga ta’sir etuvchi omillar iqtisodiyotni rivojlantirish, tadbirkorlik, ta’lim va sog‘liqni saqlashdir.

Uning ta’kidlashicha, O‘zbekiston hukumatining siyosati aholini kambag‘allikdan xalos etishga, shuningdek, odamlarni kambag‘allikka tushib qolishining oldini olish uchun ijtimoiy himoya choralaridan foydalanishga qaratilgan.