Тожикистоннинг Сўғд вилоятидаги Спитамен туманида Ўзбекистон томонидан беғараз қурилиб, жиҳозланган замонавий мактаб 27 сентябрь куни фойдаланишга топширилди.
«Дарё» мухбири Мадина Нурманнинг хабар беришича, ушбу таълим масканининг очилиш маросимида Ўзбекистон халқ таълими вазири Шерзод Шерматов, Тожикистон таълим соҳаси мутасаддилари, ўқитувчи ва ўқувчилар, ОАВ ҳамда жамоатчилик вакиллари қатнашди.
Таъкидланишича, мазкур умумтаълим мактаби Ўзбекистон Президентининг «Ўзбекистон Республикаси ва Тожикистон Республикаси ўртасида икки томонли ҳамкорликни янада кенгайтириш чора-тадбирлари тўғрисида»ги қарорига асосан ишлаб чиқилган «Йўл харитаси» ҳамда ҳукуматнинг тегишли фармойишига биноан бунёд этилди.
630 ўринга мўлжалланган мактаб ўқув жараёнларини самарали ташкиллаштириш, физика, кимё, астрономия, биология ва чизмачилик фанлари бўйича амалий машғулотларни ўтказиш, ўғил болаларни металл ва ёғочга ишлов бериш, қизларни эса уй-рўзғор ишлари, пазандачилик, ҳунар ва чеварчилик санъатини ўргатиш кўзда тутилган махсус лойиҳа асосида қурилди.
Муассасада сифатли таълим олиш учун барча имкониятлар яратилган бўлиб, ёпиқ спорт зали, очиқ стадион, 224 ўринли ошхона ва замонавий кутубхона тўлиқ жиҳозланган.
Халқ таълими вазири Шерзод Шерматовнинг айтишича, ушбу мактабда ўзбек ва тожик тилларидан ташқари, инглиз тилининг ўқитилишига ҳам алоҳида аҳамият қаратилади.
«Давлатимиз раҳбари дастлабки фаолиятиданоқ ташқи сиёсатда устувор йўналиш сифатида қўшни давлатлар билан алоқани яхшилаш ҳаракатларини бошлаган эди. Шу мақсад йўлида барча қўшни мамлакатлар, жумладан, Тожикистон билан ҳам алоқалар кучайтирилди. Сўнгги йилларда чегаралар очилиб, иқтисодий ва маданий ҳамкорлик янада мустаҳкамланди. Сўғдликларга совға сифатида туҳфа этилган мазкур мактаб ҳам яқин ҳамкорликнинг навбатдаги амалий натижасидир.
Мактаб билан танишиш вақтида ўқувчиларни кўриб жуда хурсанд бўлдим. Уларнинг бир қанча тилларда равон сўзлашишидан кўнглим кўтарилди. Келажакда мазкур билим масканидан ҳам дунёга машҳур шахсларнинг етишиб чиқишини ният қиламиз», — деди Шерзод Шерматов.
Изоҳ (0)