Андижон вилоятининг Бўстон туманида эски ва қаровсиз бино 22 кун ичида қайта таъмирланиб, Давлат хизматлари марказига фойдаланишга топширилди. Бу ҳақда «Дарё»га ДХА Андижон вилоят бошқармаси ахборот хизмати хабар берди.
Бошқарма ахборот хизматининг хабар беришича, Давлат хизматлари марказларининг турли ташкилот ва идоралар биноларида жойлашганлиги аҳолига кўплаб ноқулайликлар келтириб чиқарган. Шу сабаб Президентнинг Давлат хизматлари марказлари биноларини давлат-хусусий шериклик шартлари асосида қурилишини ташкил этиш юзасидан қарори қабул қилинган бўлиб, айни пайтда ушбу ҳужжат ижроси асосида ҳудудларда марказларни қуриш ишлари бошлаб юборилган.
Қайд этилишича, Бўстон туман Давлат хизматлари маркази бир кунда ўртача 100-150 нафар фуқарога хизмат кўрсатади. Марказнинг эски биноси туман Халқ қабулхонаси биносида жойлашганлиги сабабли кўзда тутилган стандартларга жавоб бермас эди. Бу эса норозиликларга сабаб бўлган.
Янги таъмирланган бинода барча шароитлар яратилган бўлиб, марказ зарур техник жиҳоз ва воситалар билан таъминланган. Айни кунда бинода жисмоний ва юридик шахсларга 140 дан ортиқ давлат хизмати кўрсатилмоқда. Марказда бир вақтнинг ўзида 10 нафар, бир кунда 200 нафар фуқарога хизмат кўрсатиш имконияти яратилган.
Таъкидланишича, 2020 йилнинг 10 август куни Андижон вилояти ҳокими Шуҳрат Абдураҳмонов иштирокида бўлиб ўтган аппарат йиғилишида вилоят раҳбари 13 та шаҳар ва туман ҳокимларига 2020 йил охирига қадар Давлат хизматлари марказларига алоҳида, янги бино бериш ёки давлат-хусусий-шерикчилик асосида алоҳида бино қуриш топшириғини берган. Бўстон тумани ҳокими Садбархон Мамитова томонидан ушбу топшириқ 22 кунда бажарилган.
Изоҳ (0)