Қозоғистон таълим ва фан вазири Асхат Аймағамбетов бир ойдан кўпроқ вақт олдин коронавирусга қарши Қозоғистон вакцинаси билан эмланган. Бу ҳақда вазирнинг ўзи маълум қилган, деб ёзмоқда «Kazinform» агентлиги.
«Мен ҳар куни тадқиқотлар натижалари билан танишиб боряпман, тест натижалари ва вакцинанинг самарадорлигини кўрдим, шунинг учун ўз вакцинамиз билан эмланишга қарор қилдим. Ўшандан бери кўп вақт ўтди. Мен ўзимни жуда яхши ҳис қиляпман, катарал ўзгаришлар бўлгани йўқ, ҳароратим ҳам кўтарилмади», – деган Асхат Аймағамбетов.
Вазирнинг сўзларига кўра, у коронавирус инфекциясига қарши вакцина ишлаб чиқишнинг ҳар бир босқичида қатнашган.
«Тадқиқотчилар йиллар давомида хавфли юқумли касалликларга қарши кўплаб дори-дармонларни ва вакциналарни яратиб келишмоқда, улар мамлакатимиз ташқарисида ҳам фаол қўлланилмоқда», – дейди вазир.
Аввалроқ коронавирусга қарши Қозоғистон олимлари яратган QazCovid-in вакцинаси муваффақиятли синовдан ўтказилаётгани ҳақида хабар берилганди.
«ЖССТ томонидан тартибга солинадиган барча параметрларга кўра, яъни токциклиги, пирогенлиги, алергенлиги, иммуногенлиги бўйича Қозоғистон вакцинаси ЖССТ ва Қозоғистон Давлат фармакопеяси талабларига жавоб беради», – дейилади агентлик хабарида.
Эслатиб ўтамиз, 2020 йил 1 августда Қозоғистон Биологик хавфсизлик муаммолари илмий-тадқиқот институти ишлаб чиққан иккинчи вакцина ҳам Жаҳон соғлиқни сақлаш ташкилоти веб-сайтида номзод вакцина сифатида муваффақиятли рўйхатдан ўтган.
Изоҳ (0)