Ўзбекистон Ички ишлар вазирлигининг Марказий госпитали томонидан Ўзбекистон Гимнастика федерациясининг «Универсал» спорт мажмуасида ташкил этилган 750 ўринга мўлжалланган вақтинчалик шифохонада фаолият олиб бораётган шифокор Ашурова Дилафруз Давроновна 2020 йил 18 сентябрь куни ижтимоий тармоқ орқали Ўзбекистон Президентига видеомурожаат йўллаган. Ушбу ҳолат юзасидан ИИВ изоҳ бериб ўтди.
Маълум қилинишича, шифокор томонидан йўлланган видеомурожаатда у ҳеч қандай асосларсиз ўзи фаолият олиб бораётган вақтинчалик шифохонада бир нечта қонунчиликка зид бўлган хатти-ҳаракатлар содир этилаётганлиги ҳақида маълум қилган эди. У иккинчи видеолавҳасида ижтимоий тармоқларда нотўғри маълумот тарқатиб юборганини тан олиб, мазкур вақтинчалик шифохонада тиббиёт ходимлари учун озиқ-овқат, турар жой бепул ташкил этилгани, ишлаб турган вақтида ҳамкасблари билан бўлган суҳбатларда бунга амин бўлганини таъкидлаган.
Шунингдек, ижтимоий тармоқ фойдаланувчилари ҳамда шифохона ташкилотчиларидан узр сўради, маълумотлари нотўғри бўлганлиги сабаб ўз истагига кўра қайта мурожаат этаётгани ҳақида қўшимча қилди.
Таъкидланишича, Ўзбекистон Вазирлар Маҳкамасининг 461-сон қарорига мувофиқ «Универсал» спорт мажмуасида ташкил этилган вақтинчалик шифохонада беморлар белгиланган тартибда даволанмоқда.
Ўзбекистон Вазирлар Маҳкамасининг 2020 йил 4 августдаги 461-сон «Коронавирус инфекциясини юқтирган беморларга тиббий ёрдам кўрсатиш самарадорлигини ошириш чора-тадбирлари тўғрисида»ги қарори талабларига мувофиқ, Ички ишлар вазирлигининг Марказий госпитали ҳузурида Ўзбекистон Гимнастика федерациясининг «Универсал» спорт мажмуасида 750 ўринга мўлжалланган вақтинчалик шифохона ташкил этилди. Мазкур вақтинчалик шифохона Тошкент шаҳар Юнусобод тумани Кўрҳожи ота кўчаси, 2 А-уйда жойлашган.
Вақтинчалик шифохонага 2020 йил 2 сентябрь кунидан коронавирус инфекцияси билан касалланган беморларни қабул қилиш бошланди ва шу кунга қадар ўз фаолиятини тун-у кун давом эттириб келмоқда.
Мавзуга доир: «Ўзбекистон 24» телеканали «Ўзэкспомарказ»даги тақсимот марказини тарк этишни истамаётган беморларни худбинликда айблади
Вақтинча шифохона тиббиёт ходимлари Жаҳон соғлиқни сақлаш ташкилоти ҳамда Ўзбекистон Соғлиқни сақлаш вазирлиги томонидан тайёрланган «COVID-19 билан касалланган беморларни даволаш бўйича амалий қўлланма» (7-баённома)га мувофиқ даволаш ишларини амалга ошириб келмоқда.
Вақтинчалик шифохонага шу кунга қадар 5035 нафар бемор мурожаат этган бўлиб, шулардан 1234 нафар беморларга тегишли тиббий консультациялар берилди, 3801 нафар бемор шифохонага жойлаштирилди, 2979 нафар бемор соғлиғи яхшиланганлиги сабабли уйига жавоб берилди, айни вақтда эса шифохонада 677 нафар бемор даволанмоқда.
Вақтинчалик шифохонада даволанаётган беморлар ва фаолият олиб бораётган ходимларни овқатлантириш, лаборатория ва диагностика хизматлари аутсорсинг хизмат кўрсатувчи ташкилотлар томонидан амалга оширилмоқда.
Вақтинчалик шифохонани жорий сақлаш, шунингдек, беморларни ҳамда жалб қилинган мутахассис ва бошқа ходимларни озиқ-овқат маҳсулотлари, дори воситалари, ниқоб, дезинфекция воситалари ва бошқа зарур анжомлар билан таъминлаш харажатлари Ўзбекистон Вазирлар Маҳкамасининг 2020 йил 4 августдаги 461-сон қарорига мувофиқ, Ўзбекистон Молия вазирлиги ҳузуридаги Инқирозга қарши курашиш жамғармаси маблағлари ҳисобидан қопланмоқда.
Аввалроқ июль ойи охирида Тошкентда шаҳар ҳокимлиги томонидан «Ўзэкспомарказ»нинг 3-павильонида 1000 ўринли, Мудофаа вазирлиги томонидан «Ўзэкспомарказ»нинг 1—2-павильонларида 814 ўринли, ДХХ томонидан «Ёшлик» спорт аренасида 520 ўринли, ИИВ томонидан Юнусободдаги Универсал спорт саройи (Гимнастика мажмуаси)да 750 ўринли Саралаш ва тақсимлаш марказлари ташкил этилгани ҳақида хабар берилган эди.
Шундан «Ёшлик» аренасида ташкил этилган 520 койкали Саралаш маркази беморлар билан батамом тўлгани ҳақида хабар берилганди.
Изоҳ (0)