Тошкент шаҳрининг бир қанча туманларида 16 сентябрь куни аҳоли электр энергияси ўчирилганидан шикоят қилгани ҳақида хабар берилганди. Тармоқдан узилган истеъмолчилар электр энергияси ҳисоб-китобини назорат қилишнинг автоматлаштирилган тизими билан боғлиқ муаммоларни қайд этган. Маълум қилинишича, электр энергияси қарздорлиги бор фуқаролар учун узилган. Лекин тўлов амалга оширилишига қарамасдан, электр энергиясининг узатилиши бир неча соатда ҳам тикланмаган. Монополияга қарши курашиш қўмитаси мазкур ҳолатни ўрганиб чиқди.
Қўмита томонидан маълум қилинишича, 24 сентябрь куни Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлигининг қонун ҳужжатларини бузилганлигини кўриб чиқиш бўйича махсус комиссияси томонидан мазкур ҳолат юзасидан қўзғатилган иш кўриб чиқилди.
Махсус комиссия қарорига кўра, «Тошкент шаҳар электр тармоқлари корхонаси» АЖ томонидан «Истеъмолчиларнинг ҳуқуқларини ҳимоя қилиш тўғрисида»ги қонунининг 19-моддаси биринчи қисми, Вазирлар Маҳкамасининг 2018 йил 12 январдаги 22-сонли қарори билан тасдиқланган Электр энергиясидан фойдаланиш қоидаларининг 131-банди ва 2017 йил 10 июлдаги 484-сонли қарори билан тасдиқланган Истеъмолчиларни электр энергияси ва газ тармоқларидан узиб қўйиш тартиби тўғрисидаги Низомнинг 19 ва 20-бандлари талаблари бузилишига йўл қўйилган.
Шунингдек, «Тошкент шаҳар электр тармоқлари корхонаси» АЖга юқорида келтирилган қонун ҳужжатлар талабларни бузилиш ҳолатларини тўхтатиш ва келгусида йўл қўймаслик бўйича кўрсатма берилган.
Эслатиб ўтамиз, 14 сентябрь куни Президент Шавкат Мирзиёев раислигида электр энергияси ва табиий газни ҳисобга олиш ҳамда назорат қилиш масалалари бўйича видеоселектор йиғилиши ўтказилган эди. Унда мамлакатдаги электр энергияси ва табиий газни ҳисобга олиш ва назорат қилиш бўйича яхлит онлайн тизим яратилиши белгиланган.
2020 йил 20 август куни «Ҳудудий электр тармоқлари» АЖ томонидан Тошкентда Электр энергиясини ҳисобга олишни автоматлаштириш маркази фойдаланишга топширилди.
Изоҳ (0)