АҚШ Миллий хавфсизлик агентлиги (МХА)нинг собиқ ходими Эдвард Сноуден АҚШ ҳукуматига Адлия вазирлиги даъвоси бўйича ўз китоби сотувидан тушган пулдан 5 миллион доллар тўлашга розилик билдирмаганини маълум қилди. Бу ҳақда у ўзининг Twitter’даги саҳифасида ёзиб қолдирган. Аввалроқ унинг розилик билдиргани ҳақида суд ҳужжатларига таяниб CNN хабар берганди.
«Бу келишув эмас; Мен бунга рози бўлмаганман», — деб ёзган Сноуден. МХА собиқ ходими, шунингдек, у «сургунда» бўлган вақтида ушбу иш бўйича қарор ижро этилиши мумкин эмаслигини таъкидлаган ва нима бўлганда ҳам унда бунча пул бўлмаганлигини қўшимча қилган.
Сноуден ҳуқуқларини Россияда ҳимоя қилувчи адвокат Анатолий Кучерен «РБК»га мижозининг бундай суммани тўлашга розилиги ҳақидаги маълумот ҳақиқатга зидлигини тасдиқлаган. «Бу ҳақда ким хабар берганини билмайман, бу навбатдаги спекуляция. Тушунишимча, бу Америка ОАВлари. Бу ҳақда на менга, на Эдвард Сноуденга ҳеч нарса маълум эмас», — деган у.
АҚШ президенти Дональд Трампнинг Сноуденни авф этишни кўриб чиқишга ваъда бергани ҳақида тўхталганда, адвокат бу ҳақда гап бўлиши мумкин эмаслигини айтган. «Эдвард Сноуден жиноят содир этмаган, унга нисбатан суд ҳукми йўқ. Бу ерда фақат унинг таъқиб қилиниши ҳақида гап кетиши мумкин. Гап уни ҳақорат қилиш ва камситишни тўхтатиш ҳақида бориши мумкин», — дея изоҳ берган Кучерен.
Адвокатнинг қўшимча қилишича, Сноуден ўз давлатини жуда яхши кўради ва ватанини соғинган, аммо Америка ҳукумати томонидан яратилган шароитлар унинг қайтишига ва АҚШда ишлашини давом эттиришга имкон бермайди. «У бундай қилолмайди: у ҳақида нималар дейишаётганидан хабарингиз бордир», — деб хулоса қилган Кучерен.
Сноуден Адлия вазирлигининг даъвоси бўйича АҚШ ҳукуматига ўзининг «Шахсий иш» китобини сотишдан тушган тушумдан 5 миллион доллардан кўпроқ пул тўлашга рози бўлгани ҳақида 21 сентябрь куни суд ҳужжатларига таяниб CNN хабар берганди.
Даъвода таъкидланишича, Сноуден ўз китобини олган мажбуриятга зид равишда Марказий разведка бошқармаси ва МХАга танишиб чиқиш учун топширмасдан нашр этган. Шу сабабли ундан «Шахсий иш» китобидан тушган барча маблағларни АҚШ ҳукуматига қайтаришни талаб қилган. CNN маълумотларига кўра, Сноуден китобдан тахминан 4,2 миллион доллар ишлаб топган, шунингдек, 56 та чиқишидан 1,03 миллион доллар олган. Суд материалларига кўра, ушбу чиқиш пайтида у махфий маълумотларни ошкор қилган.
Изоҳ (0)